رەسەي قازاقستان ءۇشىن قانت كۆوتاسىن جازعى ماۋسىمعا دەيىن تاعى 100 مىڭ تونناعا ارتتىرۋدى جوسپارلاپ وتىر، دەپ حابارلايدى «ادىرنا» ءتىلشىسى ۇكىمەتتىڭ ءباسپاسوز قىزمەتىنە سىلتەمە جاساپ.
17 مامىر كۇنى قازان قالاسىندا قازاقستان ۆيتسە-پرەمەرى سەرىك جۇمانعارين مەن رەسەي ۇكىمەتى توراعاسىنىڭ ورىنباسارى الەكسەي وۆەرچۋكتىڭ توراعالىعىمەن وتكەن كەزدەسۋدە قانتقا قاتىستى مامىلە كەلىسىلدى.
«2024 جىلدىڭ 3 مامىرىندا رەسەي ۇكىمەتى وسى جىلدىڭ 31 تامىزىنا دەيىن قانت شىعارۋعا ۋاقىتشا تىيىم سالۋ تۋرالى قاۋلى قابىلدادى. قازاقستان ءۇشىن 120 مىڭ توننا كولەمى قاراستىرىلعان. قويمالارداعى جانە كۆوتا شەڭبەرىندە بولىنەتىن قولداعى قوردىڭ كولەمىنە قاراماستان، قانتتى تۇتىنۋدىڭ ەڭ جوعارى سانالاتىن جاز ماۋسىمى قارساڭىندا قازاقستاندىق تاراپ ەكىجاقتى كەزدەسۋدە قانت جەتكىزۋ كۆوتاسىن تاعى 100 مىڭ تونناعا ۇلعايتۋ ماسەلەسىن كوتەردى. الدىن الا كەلىسىم الىندى، ەندى كۆوتانى ۇلعايتۋ ماسەلە 29 مامىردا ەەك كەڭەسىنىڭ وتىرىسىندا قارالماق»،—دەلىنگەن حابارلامادا.
سونداي-اق كەزدەسۋدە اعاش ماتەريالدارىن رەسەيدەن قازاقستانعا اكەتۋ ءۇشىن وتكىزۋ پۋنكتتەرىنىڭ سانىن كوبەيتۋ ماسەلەسى كوتەرىلدى. قازىرگى ۋاقىتتا قازاقستان-رەسەي شەكاراسىندا تەك 6 وتكىزۋ پۋنكتىنەن شىعارۋ عانا رۇقسات ەتىلەدى. ەندى قازانداعى كەزدەسۋدىڭ قورىتىندىسى بويىنشا رەسەي تاراپى جاقىن ارادا تاعى 4 اۆتوكولىك وتكىزۋ پۋنكتىن اشۋعا دايىن ەكەنىن ءبىلدىردى.
