Reseı Qazaqstan úshin qant kvotasyn jazǵy maýsymǵa deıin taǵy 100 myń tonnaǵa arttyrýdy josparlap otyr, dep habarlaıdy «Adyrna» tilshisi Úkimettiń baspasóz qyzmetine silteme jasap.
17 mamyr kúni Qazan qalasynda Qazaqstan vıe-premeri Serik Jumanǵarın men Reseı úkimeti tóraǵasynyń orynbasary Alekseı Overchýktyń tóraǵalyǵymen ótken kezdesýde qantqa qatysty mámile kelisildi.
«2024 jyldyń 3 mamyrynda Reseı úkimeti osy jyldyń 31 tamyzyna deıin qant shyǵarýǵa ýaqytsha tyıym salý týraly qaýly qabyldady. Qazaqstan úshin 120 myń tonna kólemi qarastyrylǵan. Qoımalardaǵy jáne kvota sheńberinde bólinetin qoldaǵy qordyń kólemine qaramastan, qantty tutynýdyń eń joǵary sanalatyn jaz maýsymy qarsańynda qazaqstandyq tarap ekijaqty kezdesýde qant jetkizý kvotasyn taǵy 100 myń tonnaǵa ulǵaıtý máselesin kóterdi. Aldyn ala kelisim alyndy, endi kvotany ulǵaıtý másele 29 mamyrda EEK Keńesiniń otyrysynda qaralmaq»,—delingen habarlamada.
Sondaı-aq kezdesýde aǵash materıaldaryn Reseıden Qazaqstanǵa áketý úshin ótkizý pýnktteriniń sanyn kóbeıtý máselesi kóterildi. Qazirgi ýaqytta Qazaqstan-Reseı shekarasynda tek 6 ótkizý pýnktinen shyǵarý ǵana ruqsat etiledi. Endi Qazandaǵy kezdesýdiń qorytyndysy boıynsha Reseı tarapy jaqyn arada taǵy 4 avtokólik ótkizý pýnktin ashýǵa daıyn ekenin bildirdi.
