الماتىدا "پسيحوسوماتيكا ماماندارى قاۋىمداستىعىنىڭ" پسيحوماتيكانى عىلىم ارقىلى اشۋعا ارنالعان ەكىنشى سەزى ءوتتى. سەزدىڭ نەگىزگى مىندەتى - پسيحوسوماتيكانى عىلىم تۇرعىسىنان قاراپايىم سوزدەرمەن اشۋ، جەلى قۇرۋ جانە پسيحوسوماتيكا سالاسىنداعى مامانداردىڭ ءبىلىمىن تولىقتىرۋ. قۇرىلتايدا پسيحوسوماتيكا سالاسىن دامىتۋعا اتسالىسىپ جۇرگەن ەڭ ۇزدىك 7 مامان ءسوز سويلەدى. ولار قازىرگى كەزدە قوعامدا بەلەڭ الىپ وتىرعان بەلسىزدىك، تۇرمىستىق زورلىق-زومبىلىق، ادام ومىرىنە گورمونداردىڭ اسەرى، اجىراسۋدىڭ كوبەيۋى سەكىلدى ءتۇرلى تاقىرىپتى كوتەردى. قۇرىلتايعا قاتىسقان Massaget.kz ءتىلشىسى بىرنەشە سپيكەردىڭ بايانداماسىن ۇسىنادى.
بارلىق اۋرۋدىڭ ەمى - ادامنىڭ ميىندا. ويتكەنى كەز كەلگەن اۋرۋدان ايىعۋ ءۇشىن ادام الدىمەن ودان جازىلاتىنىنا سەنۋى قاجەت. مي كوپ نارسەنى شەشەدى، ءتىپتى كەيدە ويمەن بەلگىلى ءبىر ءىس-ارەكەتتى بۇعاتتاۋ ارقىلى اۋىر سالدارعا تاپ بولۋىڭىز مۇمكىن. بۇل تۋرالى اندرولوگ، ۋرولوگ ەرنۇر ايناەۆ "بەدەۋلىك جانە ونىڭ الدىن الۋ" تاقىرىبىنداعى بايانداماسىندا ايتتى.
مامان كەز كەلگەن اۋرۋعا شالدىققان ادامعا "مەن جازىلىپ كەتەمىن" دەگەن وي، سەنىم كومەكتەسەتىنىن جەتكىزدى.
"بارلىق اۋرۋدىڭ ەمى - ادامنىڭ ميىندا. بۇعان عالىمدار جۇرگىزگەن زەرتتەۋلەردىڭ ناتيجەلەرى دالەل. بۇرىن اۋرۋحانا قابىرعالارىندا "اۋرۋدان جازىلۋعا دەگەن ۇمتىلىس - جازىلۋدىڭ جارتىسى" دەپ جازىلىپ تۇراتىن. بۇل ادامعا ۇلكەن ءبىر كومەك. "مەن جازىلىپ كەتەمىن" دەگەن سياقتى ويمەن، ۇمىتپەن ادام ءىس-ارەكەت جاساپ، ناتيجەگە قول جەتكىزەدى. ياعني، ادام وي جانە مي ارقىلى ءوزىن ەمدەي الادى. مىسالى، مەديتسينادا "پلاتسەبو اسەرى" دەگەن ۇعىم بار. مۇندا ءبىر ءدارىنى تەكسەرۋ ءۇشىن تاجىريبە جۇرگىزەدى. تاجىريبەگە بارلىعى 2000 ادام قاتىسادى، ونىڭ مىڭىنا تەكسەرىلىپ وتىرعان ءدارىنى بەرەدى، ال قالعان مىڭ قاتىسۋشىعا ءپىشىنى دارىگە ۇقساس زيانى جوق بور بەرەدى. سوندا ءدارى ىشكەن 1000 ادامنىڭ 900-ءى جازىلادى، ال بور قابىلداعان 1000 ادامنىڭ 200-ءى جازىلادى. بۇدان "قاتىسۋشىلار بور قابىلداسا دا قالاي جازىلدى؟" دەگەن سۇراق تۋىندايدى. قورىتىندى: جازىلعان 200 قاتىسۋشى قابىلداپ جاتقان زاتتىڭ ءدارى ەكەنىنە، سونىڭ كومەگىمەن ءوزى اۋرۋدان ايىعاتىنىنا ىشتەي سەندى، وسىلايشا پسيحولوگيالىق تۇرعىدان ءوزىن-ءوزى ەمدەپ الدى. ءبىز بۇدان پسيحولوگيالىق اسەر وتە ماڭىزدى ەكەنىن بايقايمىز", - دەدى اندرولوگ.
سونىمەن قاتار، ەرنۇر ايناەۆ بۇگىندە ەرلى-زايىپتىلار اراسىندا بەلەڭ الىپ وتىرعان بالالى بولۋدى جوسپارلاۋعا قاتىستى ۇدەرىس اۋىر سالدارعا اكەپ سوقتىرۋى ابدەن مۇمكىن ەكەنىن ەسكەرتتى.
"بۇگىندە مەن كوپ بايقاپ جۇرگەن تاعى ءبىر جايت بار. ەكى جاس ۇيلەنىپ، وتاۋ قۇرادى. قازىرگى كەزدە نەكەلەسكەننەن كەيىن جاستار مانساپ قۋ، ماتەريالدىق جاعدايدى جاقسارتۋ، ءۇي ساتىپ الۋ دەگەن سياقتى جوسپار قۇرىپ، بالالى بولۋدان ساقتانىپ جۇرەدى. ولاردى "بالالى بولۋعا ءالى دايىن ەمەسپىز، جەتكىلىكتى مولشەردە قاراجات جوق، كەيىن قينالىپ قالامىز عوي" دەگەن قورقىنىش بيلەپ، بۇعات قويادى. ال بۇل بۇعات ۇرىقتىڭ ساپاسىنا اسەر ەتىپ، ونىڭ جوق بولىپ كەتۋىنە اكەپ سوقتىرىپ جاتىر. مەن وسىنداي ماسەلە كەلەتىنمەن ناۋقاستى كوپ بايقادىم. ياعني، ولار بالالى بولۋدان ساقتانۋ ءۇشىن 5 جىل بويى جىنىستىق قاتىناس كەزىندە مۇشەقاپ، ءتۇرلى ءدارى-دەرمەك قولدانىپ جۇرەدى. ءسويتىپ، جوسپارىنىڭ بارىنە جەتىپ، ويلارىنىڭ ءبارى ورىندالعان كەزدە بالالى بولا الماي جاتادى. كەيىن ولار تاپسىرعان تالداۋ ناتيجەسىن قاراعان كەزدە، ول ناۋقاستىڭ كوبىسىندە ۇرىق ساپاسىنىڭ ناشارلاعانى انىقتالادى. بۇدان ادامنىڭ پسيحيكاسى، ميى كوپ نارسەنى شەشەتىنى، جاسايتىنى بەلگىلى بولىپ وتىر. حالىق مۇنى ءتۇسىنۋى كەرەك. ادام ميىمەن، ويىمەن وزىنە-ءوزى ماسەلە تۋدىرماۋى قاجەت", - دەدى مامان.
قۇرىلتايدا ۋرولوگتان بولەك قازاقستان رەسپۋبليكاسى سوت اكىمشىلىگىنىڭ مەملەكەتتىك ءتىلدى دامىتۋ ءبولىمىنىڭ باسشىسى، كاسىبي جۋرناليست، ساياساتتانۋشى، كوۋچ-مەنتور ايدوس سادۋاقاسوۆ تا اجىراسۋ، تۇرمىستىق زورلىق-زومبىلىق تاقىرىبىندا ءسوز سويلەدى. ونىڭ ايتۋىنشا، ەرلى-زايىپتى دامۋى جولىندا قاتار ءجۇرۋى شارت.
"مەن وسى پسيحوماتيكا بويىنشا كۋرستى ءبىر اپتا وقىعاننان كەيىن الماتىعا ايەلىمدى جىبەردىم. ويتكەنى بۇل عىلىم، بۇل ءىلىم ماعان عانا ەمەس، ايەلىمە دە قاجەت. نەگە مەن عانا وقىپ، ءبىلىپ، مىقتى بولامىن، ال ايەلىم ءۇي تىرلىگىندە وتىرادى؟ سونىمەن قاتار، بىلگەن اقپاراتىڭدى 100 پايىز باستاپقى دەرەك سەكىلدى قىلىپ جەتكىزە المايسىڭ، ءبارىبىر دە ءبىر اقپارات جەتپەي قالادى. ءسويتىپ جولداسىمدى دا الىپ كەلدىم. قازىر، شۇكىر وسى ساباققا بارعاننان كەيىن ءبىزدىڭ بالاعا دەگەن كوزقاراسىمىز جاقساردى، بالامەن تەرەڭىرەك سويلەسىپ، وعان كوڭىل بولە باستادىق. سوندىقتان، مەنىڭ كوپشىلىككە بەرەر كەڭەسىم، ەشكىم دە وتباسىداعى قيىندىقتان ساقتاندىرىلماعان، ادامنىڭ باسىنا ءتۇرلى قيىندىق كەلۋى مۇمكىن. دامۋ جولىنا ءتۇسىپ جاتقان ايەلدىڭ كۇيەۋى، ال ەركەكتىڭ ايەلى ونىمەن قاتار ءجۇرۋى قاجەت. سوندا عانا ۇيدە ۇيلەسىمدىلىك، بەرەكە، تۇسىنىستىك پايدا بولادى. ەرلى-زايىپتىنىڭ ءبىرىنىڭ عانا ءبىلىمدى بولىپ، دامۋى جەتكىلىكسىز", - دەدى ول.
