Almatyda "Psihosomatika mamandary qauymdastyǧynyŋ" psihomatikany ǧylym arqyly aşuǧa arnalǧan ekınşı sezı öttı. Sezdıŋ negızgı mındetı - psihosomatikany ǧylym tūrǧysynan qarapaiym sözdermen aşu, jelı qūru jäne psihosomatika salasyndaǧy mamandardyŋ bılımın tolyqtyru. Qūryltaida psihosomatika salasyn damytuǧa atsalysyp jürgen eŋ üzdık 7 maman söz söiledı. Olar qazırgı kezde qoǧamda beleŋ alyp otyrǧan belsızdık, tūrmystyq zorlyq-zombylyq, adam ömırıne gormondardyŋ äserı, ajyrasudyŋ köbeiuı sekıldı türlı taqyrypty köterdı. Qūryltaiǧa qatysqan Massaget.kz tılşısı bırneşe spikerdıŋ baiandamasyn ūsynady.
Barlyq aurudyŋ emı - adamnyŋ miynda. Öitkenı kez kelgen aurudan aiyǧu üşın adam aldymen odan jazylatynyna senuı qajet. Mi köp närsenı şeşedı, tıptı keide oimen belgılı bır ıs-ärekettı būǧattau arqyly auyr saldarǧa tap boluyŋyz mümkın. Būl turaly androlog, urolog Ernūr Ainaev "Bedeulık jäne onyŋ aldyn alu" taqyrybyndaǧy baiandamasynda aitty.
Maman kez kelgen auruǧa şaldyqqan adamǧa "men jazylyp ketemın" degen oi, senım kömektesetının jetkızdı.
"Barlyq aurudyŋ emı - adamnyŋ miynda. Būǧan ǧalymdar jürgızgen zertteulerdıŋ nätijelerı dälel. Būryn auruhana qabyrǧalarynda "Aurudan jazyluǧa degen ūmtylys - jazyludyŋ jartysy" dep jazylyp tūratyn. Būl adamǧa ülken bır kömek. "Men jazylyp ketemın" degen siiaqty oimen, ümıtpen adam ıs-äreket jasap, nätijege qol jetkızedı. Iаǧni, adam oi jäne mi arqyly özın emdei alady. Mysaly, medisinada "plasebo äserı" degen ūǧym bar. Mūnda bır därını tekseru üşın täjıribe jürgızedı. Täjıribege barlyǧy 2000 adam qatysady, onyŋ myŋyna tekserılıp otyrǧan därını beredı, al qalǧan myŋ qatysuşyǧa pışını därıge ūqsas ziiany joq bor beredı. Sonda därı ışken 1000 adamnyŋ 900-ı jazylady, al bor qabyldaǧan 1000 adamnyŋ 200-ı jazylady. Būdan "qatysuşylar bor qabyldasa da qalai jazyldy?" degen sūraq tuyndaidy. Qorytyndy: jazylǧan 200 qatysuşy qabyldap jatqan zattyŋ därı ekenıne, sonyŋ kömegımen özı aurudan aiyǧatynyna ıştei sendı, osylaişa psihologiialyq tūrǧydan özın-özı emdep aldy. Bız būdan psihologiialyq äser öte maŋyzdy ekenın baiqaimyz", - dedı androlog.
Sonymen qatar, Ernūr Ainaev bügınde erlı-zaiyptylar arasynda beleŋ alyp otyrǧan balaly boludy josparlauǧa qatysty üderıs auyr saldarǧa äkep soqtyruy äbden mümkın ekenın eskerttı.
"Bügınde men köp baiqap jürgen taǧy bır jait bar. Ekı jas üilenıp, otau qūrady. Qazırgı kezde nekeleskennen keiın jastar mansap quu, materialdyq jaǧdaidy jaqsartu, üi satyp alu degen siiaqty jospar qūryp, balaly boludan saqtanyp jüredı. Olardy "balaly boluǧa älı daiyn emespız, jetkılıktı mölşerde qarajat joq, keiın qinalyp qalamyz ǧoi" degen qorqynyş bilep, būǧat qoiady. Al būl būǧat ūryqtyŋ sapasyna äser etıp, onyŋ joq bolyp ketuıne äkep soqtyryp jatyr. Men osyndai mäsele keletınmen nauqasty köp baiqadym. Iаǧni, olar balaly boludan saqtanu üşın 5 jyl boiy jynystyq qatynas kezınde müşeqap, türlı därı-dermek qoldanyp jüredı. Söitıp, josparynyŋ bärıne jetıp, oilarynyŋ bärı oryndalǧan kezde balaly bola almai jatady. Keiın olar tapsyrǧan taldau nätijesın qaraǧan kezde, ol nauqastyŋ köbısınde ūryq sapasynyŋ naşarlaǧany anyqtalady. Būdan adamnyŋ psihikasy, miy köp närsenı şeşetını, jasaityny belgılı bolyp otyr. Halyq mūny tüsınuı kerek. Adam miymen, oiymen özıne-özı mäsele tudyrmauy qajet", - dedı maman.
Qūryltaida urologtan bölek Qazaqstan Respublikasy Sot äkımşılıgınıŋ Memlekettık tıldı damytu bölımınıŋ basşysy, käsıbi jurnalist, saiasattanuşy, kouch-mentor Aidos Saduaqasov ta ajyrasu, tūrmystyq zorlyq-zombylyq taqyrybynda söz söiledı. Onyŋ aituynşa, erlı-zaiypty damuy jolynda qatar jüruı şart.
"Men osy psihomatika boiynşa kursty bır apta oqyǧannan keiın Almatyǧa äielımdı jıberdım. Öitkenı būl ǧylym, būl ılım maǧan ǧana emes, äielıme de qajet. Nege men ǧana oqyp, bılıp, myqty bolamyn, al äielım üi tırlıgınde otyrady? Sonymen qatar, bılgen aqparatyŋdy 100 paiyz bastapqy derek sekıldı qylyp jetkıze almaisyŋ, bärıbır de bır aqparat jetpei qalady. Söitıp joldasymdy da alyp keldım. Qazır, şükır osy sabaqqa barǧannan keiın bızdıŋ balaǧa degen közqarasymyz jaqsardy, balamen tereŋırek söilesıp, oǧan köŋıl böle bastadyq. Sondyqtan, menıŋ köpşılıkke berer keŋesım, eşkım de otbasydaǧy qiyndyqtan saqtandyrylmaǧan, adamnyŋ basyna türlı qiyndyq keluı mümkın. Damu jolyna tüsıp jatqan äieldıŋ küieuı, al erkektıŋ äielı onymen qatar jüruı qajet. Sonda ǧana üide üilesımdılık, bereke, tüsınıstık paida bolady. Erlı-zaiyptynyŋ bırınıŋ ǧana bılımdı bolyp, damuy jetkılıksız", - dedı ol.
