قۇلسارى قالاسىنىڭ تۇرعىندارى اكىمدىك عيماراتىنىڭ الدىنا تاعى دا جينالدى، دەپ حابارلايدى "ادىرنا" ۇلتتىق پورتالى "ازاتتىق" راديوسىنا سىلتەپ.
باق مالىمەتىنشە، جينالعاندار وتەماقى ماسەلەسىن تالقىلاۋدا.
«قازىر قۇلسارى قالاسى تۇرعىندارىنىڭ عيمارات الدىندا سۋ تاسقىنىنان زارداپ شەككەندەرگە وتەماقى تولەۋ ماسەلەلەرى بويىنشا جيىنى وتۋدە»، - دەپ حابارلادى اتىراۋ وبلىسى بويىنشا جەدەل شتابى.
جىلىوي اۋدانى اكىمدىگىنىڭ الدىنا جينالعاندارعا قالا باسشىسى جۇمابەك بايراقباەۆ جاڭا باسپانا بەرۋ تەتىگىن ءتۇسىندىرىپ جاتىر. قۇلسارى تۇرعىندارىنىڭ ايتۋىنشا، اكىمدىك "باسپانا شىعىنىن تۇرعىندار قولىنا بەرمەيمىز" دەپ ايتقان.
"ول اقشاعا باسقا ءۇي الاسىڭ نەمەسە سوعان بەلگىلەنگەن جەردەن ءۇي سالىپ بەرەمىز دەيدى. جاڭا قاراتون اۋىلى مەن بولاشاق ىقشام اۋدانىنان نەمەسە اتىراۋ وبلىسىنان تاڭداعان ءۇيدى الىپ بەرەمىز دەدى. حالىق بۇعان نارازى. اقشاسىن قولعا بەر، ءوزىمىز سالامىز دەپ وتىرمىز", - دەيدى تۇرعىن گۇلبي قۋانىشقىزى.
جۇرت "مەردىگەرلەر ءۇيدى ساپاسىز سالادى" دەپ الاڭداپ وتىر. تۇرعىندار ءۇي ىرگەتاسىن ءوزى قالاپ، ساپالى سالعىسى كەلەتىنىن ايتادى.
ەسكە سالا كەتەيىك، وتكەن ايداعى اپات سالدارىنان جىلىوي اۋدانىندا 2920 ءۇيدى سۋ باسقان. بۇگىندە ونىڭ 2906-سى سۋدان تازارتىلىپ، 2667-نە تەحنيكالىق تەكسەرۋ جۇرگىزىلدى. ال 2622 تۇرعىن ۇيگە ساراپتاما جۇرگىزىلدى. بارلىعى 3000-عا جۋىق ءوتىنىش تۇسكەن. سۋ تاسقىنىنان زارداپ شەككەن 3904 تۇرعىنعا 100 پايىز بىرجولعى جاردەماقى بەرىلدى.
