24 جىلعا سوتتالعان ەكس-مينيستر قۋاندىق بيشىمباەۆتىڭ ادۆوكاتى سوت ۇكىمىنە شاعىمداناتىنىن ايتتى، دەپ حابارلايدى "ادىرنا" ۇلتتىق پورتالى.
ادۆوكات ءلايلا رامازانوۆا سوت وتىرىسىنان كەيىن Orda.kz ءتىلشىسىنىڭ سوت ۇكىمىنە بايلانىستى ساۋالىنا جاۋاپ بەردى.
«ءيا، ءبىز شاعىمدانامىز. ارينە، ءبىز ۇكىممەن كەلىسپەيمىز. جوسپارىمىز قانداي ەكەنىن ايتا المايمىن، ءبىز ءالى قۇجاتتاردى العان جوقپىز. سوت ۇكىمى شىققاننان كەيىن بەس كۇننەن كەشىكتىرمەي ولاردى قابىلداۋىمىز كەرەك»،- دەدى ءلايلا رامازانوۆا.
ال، جابىرلەنۋشى تاراپتىڭ ادۆوكاتى بولعان جاننا ورازباقوۆا الەۋمەتتىك جەلىلەرىندە ادىلقازىلارعا وبەكتيۆتىلىگى مەن ادىلدىگى ءۇشىن العىسىن ءبىلدىردى.
"قازىلار القاسىنا وبەكتيۆتىلىگى مەن ادىلدىگى ءۇشىن العىس ايتقىم كەلەدى! القابيلەر اراسىندا كوپتەگەن ايەلدەر بولدى، مەن ولارعا قانشالىقتى قيىن ەكەنىن كوردىم. جۇمىستارىڭىزعا راقمەت!" - دەدى ادۆوكات جەلىدەگى پاراقشاسىندا.
13 مامىر كۇنى سوت ايەلىن قاتىگەزدىكپەن ولتىرگەن بيشىمباەۆتى 24 جىلعا باس بوستاندىعىنان ايىردى. ەگەر ۇكىم وزگەرىسسىز قالسا، ەكس-مينيستر جازاسىن اقمولا وبلىسىنداعى ارشالى كولونياسىندا وتەيتىن بولادى.
سوت پروتسەسى ەكى ايدان استام ۋاقىتقا سوزىلعان بولاتىن. ناتيجەسىندە قۋاندىق بيشىمباەۆ كىنالى دەپ تانىلىپ، 24 جىلعا باس بوستاندىعىنان ايىرىلدى. ال ونىڭ تۋىسى باقىتجان بايجانوۆ قىلمىستى جاسىرعانى ءۇشىن ءتورت جىلعا سوتتالدى.
