الماتى اكىمدىگى قالا تۇرعىندارى مەن قوناقتارىن گۇلزارلارعا كىرمەۋگە جانە وسىمدىكتەردى زاقىمداماۋعا شاقىردى، دەپ حابارلايدى "ادىرنا" ۇلتتىق پورتالى.
جەلىدە گۇلدەرمەن تۇسكەن ادەمى فوتولاردان بولەك تۇرعىنداردىڭ ءساتتى سەلفي جاساۋ ءۇشىن گۇلدەردى قالاي تالاپ، تاپتايتىنى كورسەتىلگەن بەينەلەر تاراعان. سول سەبەپتى اكىمدىك گۇلزارداعى سۋرەت ءۇشىن ايىپپۇل سالماق.
الماتى ەكولوگيا جانە قورشاعان ورتانى قورعاۋ باسقارماسىنىڭ مالىمەتىنشە، ەسەنتاي وزەنىنىڭ بويىندا جايقالىپ ءوسىپ تۇرعان قىزعالداقتار كۇزدە ەگىلگەن. اۋا رايى قولايلى بولعان كەزدە گۇلدەر ءساۋىردىڭ ورتاسىنان مامىرعا دەيىن گۇلدەيدى ەكەن.
“الەۋمەتتىك جەلىلەردە تىركەلگەن فاكتىلەرگە بايلانىستى دەپارتامەنت الماتى تۇرعىندارى مەن قوناقتارىن ساندىك گۇلدى كوگالداندىرۋعا جانە قوعامدىق ورىندارعا قامقورلىق جاساۋعا شاقىرادى”، – دەپ حابارلادى الماتى اكىمدىگى.
قولدانىستاعى زاڭناماعا سايكەس اباتتاندىرۋ ەرەجەلەرىن بۇزعانى ءۇشىن اكىمشىلىك جاۋاپكەرشىلىك قاراستىرىلعانىن ەسكە سالادى. دەمەك، جەكە تۇلعالارعا ەسكەرتۋ نەمەسە 20 اەك (تەڭگەمەن ەسەپتەگەندە 73 840 تەڭگە), شاعىن كاسىپكەرلىك سۋبەكتىلەرىنە 30 اەك (110 760 تەڭگە), ورتا كاسىپكەرلىك سۋبەكتىلەرى ءۇشىن 40 اەك (147 680 تەڭگە), ءىرى كاسىپورىندار ءۇشىن 100 اەك (369 200 تەڭگە) ايىپپۇل سالىناتىنى بەلگىلى بولدى.
ايتا كەتەيىك، وتكەن ايدا تۇركىستان وبلىسىنداعى ورداباسى اۋدانىندا ستۋدەنت قىزدىڭ گرەيگ قىزعالداقتارىن جۇلىپ، سۋرەتكە تۇسكەنى ءۇشىن ميلليون تەڭگەدەن استام ايىپپۇل ارقالاۋى مۇمكىن ەكەنىن جازعان بولاتىنبىز.
