الماتى وبلىسىندا بالانى قاعىپ، مەرت قىلعان كۇدىكتى تەرگەۋ يزولياتورىنا قامالماعان، دەپ حابارلايدى "ادىرنا" ۇلتتىق پورتالى ينفورمبيۋرو جاڭالىقتارىنا سىلتەپ.
ءۇي ماڭىندا ويناپ جۇرگەن 5 جاسار ءالي وعلى زۇلقاينارىندى كولىك قاعىپ كەتكەن. سالدارىنان بالا كوز جۇمعان. مارقۇمنىڭ اتا-اناسى كىنالىلەر ءالى جازاسىن الماستان ءىستى جابۋعا تىرىسىپ جاتقانىن حابارلادى. ال قايعىلى جاعدايعا كۋا بولعاندار كۇدىكتىنىڭ شارا قولدانباعانىن ايتادى.
“مەن جەردە جاتقان بالانى كورىپ، بىردەن اتا-اناسىن ايعايلاپ شاقىردىم. ءبارىمىز نە ىستەرىمىزدى بىلمەي قالدىق. كولىك جولدىڭ ار جاق بەتىندە تۇر ەكەن. جۇرگىزۋشىسى ۇزاق ۋاقىت شىقپادى. جەدەل جاردەم شاقىرىپ جاتقاندا، بالانىڭ جانىنا كەلىپ، بالاعات سوزدەر ايتتى. ارتىنشا كولىگىنىڭ ماڭىنا بارىپ تەلەفونمەن سويلەستى”، – دەدى اۋىل تۇرعىنى زارينا ساعاراەۆا.
اۋىل تۇرعىندارى ءبۇلدىرشىندى قاققان كولىك يەسى وسى اۋىلدىڭ تۇرعىنى ءارى مەكتەپتە مۇعالىم بولىپ جۇمىس ىستەيدى دەيدى. ال مارقۇمنىڭ تۋىستارىنىڭ سوزىنشە، وقيعا بولعان كۇنى قۇزىرلى ورگان قىزمەتكەرلەرى جۇرگىزۋشىنىڭ جاعدايىنا قاتىستى ساراپتاما جۇرگىزبەگەن، تەرگەۋگە دە الماعان.
“قاققان كولىك جۇرگىزۋشىسىن قامامادى، ەشقانداي شارا قولدانىلمادى. ءتىپتى كەشىرىم سۇراعان جوق. كەشە تۋىستارىمەن كەلىپ، ءوزىنىڭ كىناسىز ەكەنىن ايتىپ، كەرىسىنشە ءبىزدى بالاعاتتاپ كەتتى. مەن كىنالى ايەل ءتيىستى جازاسىن السا دەيمىن. بۇگىن باۋىرىم ءولدى، ەندى ەرتەڭ تاعى بىرەۋدىڭ بالاسى ولەدى. ادىلەتتىلىك ورناۋى ءتيىس”، – دەدى مارقۇمنىڭ اعاسى مۇرات ءابيتوۆ.
ال مۇنداي ءىستىڭ اۋىلدا ءبىرىنشى رەت بولعانىن مالىمدەگەن وكرۋگ اكىمى ءىستى قۇزىرلى ورگانعا تاپسىرعانىن ايتقان.
“قيىن جاعداي بولىپ وتىر. بۇل ماسەلەمەن بۇگىندە ەڭبەكشىقازاق اۋدانىنىڭ پوليتسياسى اينالىسىپ جاتىر”، – دەدى سايماساي اۋىلدىق وكرۋگىنىڭ اكىمى باقىتجان چۋرماكوۆ.
الماتى وبلىستىق پوليتسيا دەپارتامەنتىنىڭ مالىمەتىنشە قىلمىستىق كودەكستىڭ 345-بابى "كولiك قۇرالدارىن باسقاراتىن ادامداردىڭ جول ءجۇرىسى نەمەسە كولiك قۇرالدارىن پايدالانۋ قاعيدالارىن بۇزۋ" بابى بويىنشا ءىس قوزعالعان.
دەگەنمەن مارقۇمنىڭ تۋىستارى بۇل ىسكە كوڭىلى تولمايتىندارىن ايتادى.
