12 مامىر كۇنى ۆيتسە-پرەمەر قانات بوزىمباەۆ اتىراۋ قالاسىنداعى سۋ تاسقىنىنا قارسى قۇرىلىستاردى تەكسەرىپ، ەكى سۋ ارناسىنىڭ جۇمىسىمەن تانىستى. بۇل تۋرالى primeminister.kz جاريالادى، دەپ حابارلايدى “ادىرنا” ۇلتتىق پورتالى.
مالىمەت بويىنشا، تەكسەرىلگەن العاشقى نىسان 32 شاقىرىمعا سوزىلعان «سوكولوك» ارناسى بولدى، ول جايىق وزەنىنىڭ ۇلكەن سۋ اعىسىن اتىراۋعا قاراي باعىتتاۋعا ارنالعان. «سوكولوك» قالانى اينالىپ ءوتىپ، جايىق پەن كاسپي تەڭىزىن قوسادى جانە سەكۋندىنا 100 تەكشە مەتر سۋ قابىلداي الادى. سونداي-اق ۆيتسە-پرەمەر ۇزىندىعى 24 شاقىرىم بولاتىن جاڭا ارنانىڭ جۇمىسىن تەكسەردى.
بۇدان ءارى قانات بوزىمباەۆ تاۋلىك بويى كەزەكشىلىك ۇيىمداستىرىلعان قالاداعى قاۋىپتى ۋچاسكەلەرگە باردى. اتىراۋدى قورعايتىن بوگەتتەردىڭ جالپى ۇزىندىعى – 252 كم.
12 مامىردا قالاداعى سۋ دەڭگەيى 1 سم-گە كوتەرىلىپ، 539 سم-گە جەتتى، شەكتىك بەلگى – 550 سم. اتىراۋدا سۋ تاسقىنىنىڭ شارىقتاۋ شەگى شامامەن 4-5 كۇننەن كەيىن بولادى دەپ بولجانىپ وتىر. وسىعان بايلانىستى ۆيتسە-پرەمەر جاعالاۋدىڭ سۋ شايىپ كەتەتىن جەرلەرىندە بوگەتتەردى نىعايتۋدى، اتاپ ايتقاندا ولاردى گەوتەكستيلدەرمەن جانە بەتون بلوكتارمەن نىعايتۋدى تاپسىردى.
