اقتاۋ تۇرعىنى جۇبايىنان زورلىق-زومبىلىق كورەتىنىن ايتىپ، كوپتەن كومەك سۇرادى، دەپ حابارلايدى "ادىرنا" ۇلتتىق پورتالى Lada.kz-كە سىلتەپ.
اقتاۋلىق ارايلىم ەسىمدى كەلىنشەك جۇبايىنىڭ زورلىق-زومبىلىق جاساپ، قۋدالاۋىنا بايلانىستى جەلىگە بەينە جۇكتەپ، قازاقستاننىڭ قۇقىق قورعاۋ ورگاندارىنان كومەك سۇرادى. ايتۋىنشا، ايەل جۇبايىمەن 13 جىل بىرگە تۇرىپ كەلگەن.
"بىلەسىزدەر بە، مەن بيشىمباەۆقا قاتىستى سوت پروتسەسىن كورىپ، تاڭعالدىم. ونىڭ نە ايتاتىنىن الدىن-الا بىلگەن سياقتىمىن. داۋسى، سويلەۋ مانەرى. مۇنداي ادامدار بىردەي ءومىر سالتىن ۇستانىپ، بىردەي ويلاۋ قابىلەتىنە يە بولا ما؟ ءوز باسىم توزاقتا ءومىر ءسۇردىم. ودان 2023 جىلى كەتكىم كەلدى، بىراق ءۇش كىشكەنتاي بالام بار ەدى. ول مەنى اتا-انا قۇقىعىنان ايىرامىن دەپ قورقىتتى، اڭعال جانە جاس بولدىم. قورىققانىمنان قايتىپ كەلدىم. اقىرىندا ودان تاياق دەپ اۋرۋحاناعا تۇستىم", - دەيدى اقتاۋ تۇرعىنى.
ارايلىم كۇيەۋىمەن كەزدەسكەننەن سوڭ اۋرۋحاناعا تۇسكەن. ءتىپتى ناۋرىزدا ەر ادامعا ايەلىنە جاقىنداۋعا تىيىم سالاتىن قورعاۋ نۇسقاماسى تۋرالى ۇكىم دە شىققان.
"9 ناۋرىزدا كۇيەۋىم اقتاۋ اۋەجايىنان كەلە جاتقانىمدا ىزىمنەن ءتۇسىپ اپاتتى جاعداي تۋعىزدى. سونىڭ سالدارىنان مەن توقتاۋعا ءماجبۇر بولدىم. ول كولىگىمە جاقىنداپ كەلىپ، ەسىكتى اشۋىمدى تالاپ ەتتى. قوقان-لوققى كورسەتىپ، بەيادەپ سوزدەرىن ايتتى. مەن ەسىكتەردى جاۋىپ الدىم. ول كوپ ويلانباستان جۇرگىزۋشى جاقتاعى اينەكتى ءبىر ۇرىپ، سىندىردى", - دەيدى ايەل.
ايەلدىڭ جانىندا قۇربىسى دا بولعان. ول ەرلى-زايىپتىلاردىڭ اراسىنداعى جاندالدى بەينەگە تۇسىرگەن. بۇل تۋرالى كەلىنشەكتىڭ ءوزى باياندادى.
"پوليتسيا قىزمەتكەرلەرى مەنىڭ جاعدايىمدى كورە تۇرا، اسىقپاي، شامامەن 10 مينۋتتان كەيىن عانا قوڭىراۋ شالدى. ونىمەن سىپايى تۇردە سويلەستى. ول مەنى ءتىپتى پوليتسيا تۇرسا دا قورقىتۋدان جاسقانبادى. قۇربىم جاعدايعا ارالاسىپ ەدى "جەكە وتباسىلىق ومىرگە ارالاسپاۋىن جانە ارانداتۋشىلىق تۋدىرماۋىن" سۇرادى. ال ماعان ورنىمنان تۇرىپ، كولىكتەرىنە بارىپ، ارىز جازۋىم كەرەك دەدى. مەن سترەسس پەن سۋىقتان دىرىلدەي باستادىم، بۇكىل دەنەم قۇرىسىپ قالدى. بۇل قورقىنىشتى ءتۇس سەكىلدى. جەدەل جاردەم كەلگەندە عانا ەسىم جيىلعانداي بولدى”، - دەدى ول.
ايەل ادام كەيىنىرەك اۋرۋحاناعا كەلگەن پوليتسەيلەردىڭ قورعاۋ نۇسقاماسىنىڭ بار ەكەنىن بىلمەيتىندەرىن مالىمدەپتى.
