تۇركيا پرەزيدەنتى جانىنداعى قورعانىس ونەركاسىبى باسقارماسىنىڭ قولداۋىمەن، Turkish Aerospace Industries (TAI) ازىرلەگەن KAAN “قاعان” ۇلتتىق جاۋىنگەرلىك ۇشاعى ەكىنشى مارتە سىناقتان ءساتتى ءوتتى، دەپ حابارلايدى “ادىرنا” ۇلتتىق پورتالى.
اگەنتتىك مالىمدەمەسىنە سايكەس، 10 مامىر كۇنى ەكىنشى مارتە كوككە كوتەرىلگەن KAAN جاۋىنگەرلىك ۇشاعى 10 مىڭ فۋت بيىكتىكتە 230 ءتۇيىن جىلدامدىقپەن 14 مينۋت بويى ۇشقان.
قورعانىس ونەركاسىبى ديرەكتسياسىنىڭ باسشىسى حالۋك گورگۇن KAAN-نىڭ ەكىنشى رەيسى اياقتالعاننان كەيىن سىناقتان وتكىزگەن ۇشقىشتارمەن جانە جوبانى جاساۋشى توپپەن كەزدەستى.
ول تاعى ءبىر تاريحي ءساتتىڭ ورىن العانىن ايتىپ، وسى وقيعانىڭ كۋاگەرى بولعانى ءۇشىن العىسىن جاۋدىردى.
«تۇرىك اۆياتسيا جانە قورعانىس ونەركاسىبى تاريحىندا تاعى ءبىر ماڭىزدى كۇنگە كۋا بولدىق. بۇگىن ءبىزدىڭ جويعىش ۇشاعىمىز ەكىنشى ۇشۋىن ورىندادى. ول 21 اقپاندا العاشقى رەيسىن جاساعان بولاتىن. بۇگىن ءبىرىنشى رەيستەن الىنعان مالىمەتتەر باعالانىپ، تالدانعاننان كەيىن ەكىنشى رەيسكە دايىندىق اياقتالدى. وسى رەيستەن الىنعان تاجىريبەنى بۇكىل كوماندا باعالايدى جانە الداعى رەيستەرگە دايىندىق جالعاسادى. ءبىز بارلىق قىزمەتكەرلەرىمىزگە، ينجەنەرلەرگە، ۇشقىشتارىمىزعا جانە سىناق جاساعان ۇشقىشتارىمىزعا كۇش-جىگەرلەرى ءۇشىن العىس بىلدىرەمىز جانە ەلىمىزگە ساتتىلىك تىلەيمىز» دەدى گورگۇن.
