اقش ازاماتى اتا-اناسىنىڭ 80 جىل بۇرىنعى قۇجاتتارىن قازاقستاننان تاۋىپ الدى. بۇل تۋرالى Polisia.kz سايتى جاريالادى، دەپ حابارلايدى “ادىرنا” ۇلتتىق پورتالى.
اقش ازاماتىنا تۋىستارى تۋرالى اقپاراتتى ىزدەۋگە پوليتسيا كومەكتەسكەن.
«امەريكالىق دجەفف شاينگولد قىزىلوردا وبلىسىنىڭ پوليتسيا دەپارتامەنتىنە اكەسى تۋرالى مالىمەت سۇراپ جۇگىندى. ونىڭ اكەسى – ۇلتى ەۆرەي، تەرەڭوزەك اۋدانىندا تۇرعان (قازىرگى سىرداريا) جانە 1943 جىلى قۋعىن-سۇرگىن كەزىندە قاماۋعا الىنعان. پوليتسيا مۇراعاتىندا ۇلىنىڭ ءوتىنىشى بويىنشا جان-جاقتى ىزدەۋ جۇمىستارى جۇرگىزىلدى”، دەلىنگەن اقپاراتتا.
فوتو: polisia.kz
دجەفف شاينگولدتىڭ ايتۋىنشا، قۇجاتتاردى ىزدەۋ بارىسىندا اتا-اناسى تۋرالى ءبىرشاما ماعلۇمات العان.
"2022 جىلى اتا-انامنىڭ 1942 جىلى قازاقستاندا ۇلى وتان سوعىسى كەزىندە تۇرعانىن ءبىلدىم. ولار پولشادان ناتسيستەردەن قاشقان. بىزدە سوت حاتتاماسىنان باسقا مالىمەتتەر بولعان جوق. ىزدەۋ ناتيجەسىندە مۇراعاتتا 80 جىلعا جۋىق ساقتالعان قۇجاتتار تابىلدى. ولار مەنىڭ اتا-انام مەن №6 اۋىلدا جەرلەنگەن اعاما قاتىستى قۇجاتتار. پوليتسەيلەردىڭ ارقاسىندا ءبىز ولاردىڭ 1942 جىلدان 1946 جىلعا دەيىن ومىرلەرىنەن ءبىرشاما ماعلۇمات الدىق", – دەيدى دجەفف شاينگولد.
قازاقستانعا كەلگەن شەتەلدىك ەرلى-زايىپتى اتا-اناسى عۇمىر كەشكەن قازاق جەرىنە جانە اعاسى جەرلەنگەن زيراتقا بارىپ، تاعزىم ەتتى. ولار اتا-اناسىنىڭ قىمبات بەينەسىن جادىندا ساقتاۋ ءۇشىن ەستەلىكتەرىمەن ءبولىستى.
ايتا كەتسەك، وبلىستىق پوليتسيا دەپارتامەنتىنىڭ مۇراعاتىندا 30 مىڭنان استام قۇجات ساقتالعان. بۇل قۇجاتتار تۋىستارىنىڭ تاعدىرى تۋرالى مالىمەت ىزدەگەن ءجۇز مىڭداعان ادامدارعا، سونىمەن قاتار تاريحي اقپاراتتى تولىعىمەن قالپىنا كەلتىرۋ ءۇشىن عالىمدار، جۋرناليستەر مەن تاريحشىلار ءۇشىن وتە ماڭىزدى.
