قىرعىزستاندا "بالمۇزداق تيەلگەن فۋرگون" دەپ حابارلانعان جۇك كولىگى اشىق اسپان استىندا «ماناس» ەپوسىن ورىنداعان 29 وقۋشىنى قاعىپ كەتتى. جەتى ادام جانساقتاۋ بولىمىندە جاتىر. بۇل تۋرالى Kaktus باسىلىمى جاريالادى، دەپ حابارلايدى “ادىرنا” ۇلتتىق پورتالى.
وقيعا 2 مامىردا جالالاباد وبلىسىندا بولعان.
اقپاراتقا سايكەس، قايعىلى وقيعا مادەني شارا كەزىندە بولعان. مەكتەپ وقۋشىلارى «ماناس» ەپوسىنان ءۇزىندى وقىپ، ءنومىر كورسەتتى. وقيعا كەزىندە "پورتەر" جۇك كولىگى ىلديعا قاراي قۇلديلاپ، بالالاردى قاعىپ كەتكەن. وقيعادان تارالعان ۆيدەودا جۇك كولىگىنىڭ كيىز ءۇيدى قاعىپ بارىپ توقتاعانى كورىنەدى. كيىز ءۇي قيراپ قالعان. كولىك كيىز ۇيگە دەيىن قانشاما ادامدى قاققان، كيىز ۇيدە قانشا ادام بولعان - وقيعانىڭ ەگجەي-تەگجەيى ازىرگە حابارلانبادى.
24.kg اگەنتتىگىنىڭ حابارلاۋىنشا، اپات سالدارىنان 9 بەن 16 جاس ارالىعىنداعى 29 ورتا مەكتەپ وقۋشىسى ءارتۇرلى اۋىرلىقتاعى جاراقاتتارمەن اۋرۋحاناعا جەتكىزىلگەن.
قىرعىزستان دەنساۋلىق ساقتاۋ مينيسترلىگىنىڭ مالىمەتىنشە، جەتى بالا جالال-اباد وبلىستىق بالالار اۋرۋحاناسىنىڭ جانساقتاۋ بولىمىنە جاتقىزىلدى، ۇشەۋىنىڭ جاعدايى اۋىر. مالىمەتتەر ءالى دە وزگەرۋى مۇمكىن.
وبلىستىق پوليتسيا دەپارتامەنتى بۇل دەرەك تىركەلىپ، قازىر تەرگەۋ امالدارى جۇرگىزىلىپ جاتقانىن حابارلادى. قۇقىق قورعاۋ ورگاندارىنىڭ مالىمەتىنشە، جۇرگىزۋشى جۇك كولىگىن جوعارىراق جەرگە قويعان، بىراق كولىك تومەن قاراي قۇلديلاپ كەتكەن.
بۇل ورتالىق ازيا ەلدەرىندە كولىكتى قاۋىپسىزدىك شارالارىن قاراستىرماي قاڭتارىپ قويۋ سالدارىنان اپاتتار جيىلەگەن كەزدە بولىپ وتىرعان وقيعا. بىلتىر ءساۋىر ايىندا قازاقستاندا شىمكەنتتە جۇرگىزۋشىسى جوق اۆتوبۋس ءجۇرىپ كەتىپ، 4 جاياۋ ادامدى قاعىپ كەتىپ، مەرت قىلعان. ودان كەيىن قىركۇيەك ايىندا الماتىدا جول جيەگىندە تۇرعان اۆتوبۋس وزدىگىنەن شەگىنىپ كەتىپ، ءتورت كولىككە سوعىلعان.
