باتىس قازاقستان وبلىسى بايتەرەك اۋدانىنا قاراستى كوشىم كانالىنىڭ سۋ دەڭگەيى ءبىر تاۋلىكتە 43 سانتيمەترگە كوتەرىلدى، دەپ حابارلايدى "ادىرنا" ۇلتتىق پورتالى kaz.inform سايتىنا سىلتەپ.
«قازگيدرومەت» رمك بقو فيليالىنىڭ 1 مامىر كۇنگى تاڭعى ساعات 08.00-دەگى مالىمەتى بويىنشا كانالداعى سۋ دەڭگەيى 817 سانتيمەتردى كورسەتىپ، قاۋىپتى شەكتەن (800 سم) قايتا اسىپ كەتتى.
كەشە وسىنداي ۋاقىتتا سۋ دەڭگەيى 774 سانتيمەتر بولعان ەدى.
سول سەكىلدى جايىق وزەنىندەگى سۋ دەڭگەيى اقجايىق اۋدانى تايپاق گيدروبەكەتىندە ءبىر تاۋلىكتە 34 سانتيمەترگە جوعارىلادى. قازىر مۇندا 7 مەترگە (699 سم، قاۋىپتى شەگى - 850 سم) جۋىقتادى.
جايىق وزەنىنىڭ باسقا گيدروبەكەتتەرىندە سۋ دەڭگەيى ءتۇسىپ جاتىر.
اقجايىق اۋدانى تۇرعىندارىنىڭ سوزىنە قاراعاندا، بىرنەشە اۋىلدا اۋىز سۋ ۇڭعىمالارىن سۋ باسقان. سوعان بايلانىستى اۋىلداردى اۋىز سۋمەن قامتۋدا قيىندىقتار تۋىنداپ وتىر.
اۋدان اكىمى مۇرات سەردالين بۇل ماسەلەنىڭ راس ەكەندىگىن جەتكىزدى.
«اۋىز سۋ ۇڭعىمالارىنىڭ كوبى جايىق وزەنى بويىندا تومەندە، ساي-سالادا ورنالاسقان. سوندىقتان ولاردىڭ ءبارىن تاسقىن سۋدان الىپ قالۋ مۇمكىن بولمادى. دەگەنمەن الدىن الا رەزەرۆۋارلارعا سۋ جيناقتادىق. تۇرعىندارعا ەسكەرتىپ، قۇدىقتارعا سۋ قۇيدىرتتىق. اۋىلدىق وكرۋگتەردە جەتى-ون كۇنگە جەتەتىن سۋ قورى بار»، دەدى م.سەردالين.
