تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى لاۋازىمىنان بوساتىلدى، دەپ حابارلايدى “ادىرنا” ءتىلشىسى.
مەملەكەت باسشىسىنىڭ جارلىعىمەن باعدات باتىربەكۇلى مۋسين قازاقستان رەسپۋبليكاسىنىڭ تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى لاۋازىمىنان بوساتىلدى.
ول بۇل قىزمەتكە 2020 جىلدىڭ 2 قىركۇيەگىندە تاعايىندالعان.
باعدات باتىربەكۇلى 1983 جىلعى، پاۆلودار وبلىسى ەكىباستۇز قالاسىنىڭ تۋماسى. سۇلەيمەن دەميرەل اتىنداعى ۋنيۆەرسيتەتتى "ينجەنەر-جۇيە تەحنيگى" ماماندىعى بويىنشا، قازاق قۇقىقتانۋ جانە حالىقارالىق قاتىناستار ينستيتۋتىن "زاڭگەر" ماماندىعى بويىنشا بىتىرگەن.
ەڭبەك جولىن ينجەنەر-باعدارلاماشى بولىپ باستاپ، ادىلەت مينيسترلىگىنىڭ "رەسپۋبليكالىق قۇقىقتىق اقپارات ورتالىعى" رمك اج سۇيەمەلدەۋ ءبولىمىنىڭ باستىعى، قر ادىلەت مينيسترلىگىنىڭ ەكونوميكا جانە قارجى دەپارتامەنتى اقپاراتتىق تەحنولوگيالار باسقارماسىنىڭ باستىعى بولىپ جۇمىس ىستەدى.
ودان كەيىن قر بايلانىس جانە اقپارات مينيسترلىگىنىڭ قۇرىلىمىندا باسشىلىق قىزمەتتەردى، "ۇلتتىق اقپاراتتىق تەحنولوگيالار" اق، "قازپوشتا" اق، قر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ كوميتەتىن باسقاردى.
قر پرەزيدەنتىنىڭ تسيفرلاندىرۋ جانە يننوۆاتسيالىق تەحنولوگيالار جونىندەگى كەڭەسشىسى بولعان.
