م.اۋەزوۆتىڭ قىرعىز تىلىندەگى لاتىن ارپىمەن جازىلعان «كوك قاسقىر» شىعارماسى تابىلدى، دەپ حابارلايدى "ادىرنا" ۇلتتىق پورتالى ەgemen.kz سايتىنداعى ماتەريالعا سىلتەپ.
فرۋنزە قالاسىنداعى «كيرگوسيزدات» تيپوگرافياسىنان 10.000 دانامەن جارىققا شىققان 35 بەتتىك شىعارما 1928 جىلى جاريالاندى. بۇل تۋرالى ا.قۇسايىنوۆ اتىنداعى ەۋرازيا گۋمانيتارلىق ينستيتۋتىنىڭ دوتسەنتى، فيلولوگيا عىلىمدارىنىڭ كانديداتى لاۋرا داۋرەنبەكوۆا بىلاي جازدى:
"2023 جىلدىڭ كۇز ايىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ دوتسەنتى، فيلولوگيا عىلىمدارىنىڭ كانديداتى ەركىنگۇل سولتاناەۆا ەكەۋمىز عجبم عىلىم كوميتەتى قارجىلاندىراتىن ار19679312 «الاش قايراتكەرلەرىنىڭ اۋدارما ەڭبەكتەرىندەگى ادامزاتقا ورتاق قۇندىلىقتار» عىلىمي جوباسى اياسىندا ىسساپارمەن قىرعىزستان رەسپۋبليكاسىنىڭ مەملەكەتتىك ورتالىق ارحيۆىنە بارىپ، اتالعان ارحيۆتەن م.اۋەزوۆتىڭ قىرعىز تىلىندەگى لاتىن ارپىمەن جازىلعان «كوك قاسقىر» شىعارماسىن كەزدەستىرگەن ەدىك" دەيدى ول.
كىتاپتىڭ ارتىندا قىرعىز تىلىندە قولجازبا دا تىركەلگەن. لاۋرا داۋرەنبەكوۆا باستاپقىدا بۇل شىعارمانى م.اۋەزوۆتىڭ «كوكسەرەك» شىعارماسىنىڭ قىرعىز تىلىندەگى اۋدارماسى دەپ ويلاپ قالعان. الايدا:
"كىتاپتىڭ مۇقاباسىندا «م.اۋەزوۆ. سەرىي ۆولك. دەتسكي راسسكاز. نا كيرگيزسكوم يازىكە» دەپ بەرىلىپتى. كىتاپتىڭ ارتىنا شىعارمانىڭ قىرعىز تىلىندەگى قولجازباسى بىرگە ءتىركەلگەن. بىراق قىرعىز تىلىنە كىمنىڭ اۋدارعانى جازىلماعان. كىتاپ قىرعىز تىلىندە بولعاندىقتان، اسىقپاي تانىسۋىمىز كەرەك بولدى. باسىندا بۇل شىعارمانى م.اۋەزوۆتىڭ «كوكسەرەك» شىعارماسىنىڭ قىرعىز تىلىندەگى اۋدارماسى دەپ ويلادىق. كەيىن تانىسا كەلە، مۇلدە باسقا شىعارما ەكەنىنە كوزىمىز جەتىپ، م.اۋەزوۆتىڭ بارلىق شىعارماسىن قايتا قاراپ شىقتىق" دەپ جازدى ول.