17 ناۋرىز – «شاڭىراق كۇنىندە» قوستانايلىقتار جاپپاي شاڭعى تەبۋ جارىسىنا قاتىستى. جادىراعان جەكسەنبىدەگى «وتباسىلىق سپورت كۇنى» دەپ اتالعان ءىس-شارا ەسى كىرگەن بالا مەن ەگدە جاستاعى اۋەسقوي شاڭعىشىلاردىڭ باسىن قوستى.
سپورت ارقاشان دا ءبىزدى بىرىكتىرەدى، العا جەتەلەيدى. بۇنداي ءىس-شارالار وتباسىلىق قۇندىلىقتاردى ارتتىرۋعا، سالاۋاتتى ءومىر سۇرۋگە ىقپال ەتەدى. ول ءۇشىن وبلىسىمىزدا جاقسى جاعداي جاسالىنعان، ءالى دە سپورتتى دامىتۋعا ارنالعان اۋقىمدى جوبالار جوسپارلانعان. ناۋرىز مەيرامى بارشاڭىزعا بەرەكە، جاقسىلىق پەن مولشىلىق اكەلسىن، - دەپ جارىستىڭ اشىلۋ سالتاناتىندا قاتىسۋشىلاردى ايماق باسشىسى قۇمار اقساقالوۆ قۇتتىقتادى.
وبلىس اكىمى بارلىق قاتىسۋشىلار ءۇشىن بەلگىلەنگەن مىڭ مەتر اراقاشىقتى اينالىپ ءوتتى. سپورتتىق ءىس-شاراعا بارلىعى 500-گە جۋىق ادام ات سالىستى، ەڭ ەرەسەك قاتىسۋشىنىڭ جاسى 80-گە تاياۋ بولسا، 5 جاستاعى بۇلدىرشىندەر دە بۇل جارىستان تىس قالمادى.
جارىسقا قاتىسۋشىلار 3 جاس ساناتىنا ءبولىنىپ، الدىمەن، شاڭعى تەبۋگە 17 جانە ودان كىشى جاستاعىلار شىقتى. كەلەسى 40-تان جوعارىلار بولسا، ولاردان كەيىن 18-39 جاس ارالىعىنداعى سپورت سۇيەر قاۋىم وزدەرىنە بەرىلگەن قاشىقتىقتى ءجۇرىپ ءوتتى.
ايتا كەتۋ كەرەك، 1 ساناتتا مەكتەپ جاسىنداعى 250 شاڭعىشى ونەر كورسەتىپ، ەرەكشە بەلسەندىلىك تانىتتى. ولاردىڭ ارقايسىنا باسسەينگە ارنالعان تەگىن ابونەمەنت تارتۋ ەتىلدى.
