"حابار" ارناسىنداعى "بىراق..." باعدارلاماسى قوعامدىق رەزونانس تۋدىردى، دەپ حابارلايدى "ادىرنا" ۇلتتىق پورتالى بەلسەندى دينا ەلگەزەكتىڭ پوستىنا سىلتەپ.
"حابار" ارناسى تىكەلەي ەفيردە كورسەتكەن "بىراق..." باعدارلاماسىنىڭ تۇرمىستىق زورلىق-زومبىلىقتىڭ قۇربانى بولعان ايەل تۋرالى شىعارىلىمى كوپتىڭ اشۋىنا ءتيدى.
جۋرناليست، بەلسەندى دينا ەلگەزەكتىڭ جازۋىنشا، باعدارلاما اۆتورلارى "ىشكىش" كۇيەۋىنىڭ تەپكىسىنە توزگەن، جابىرلەنۋشى ايەلدى ەفيرگە الداپ شىعارعان:
«بىراق» دەگەن توك-شوۋ كەشە جىلدار بويى كۇيەۋىنەن تاياق جەپ، اقىرىندا قولىن سىندىرعان سوڭ التى بالاسىمەن اجىراسىپ كەتكەن ايەلدى ستۋدياعا شاقىردى. ايەل اجىراسقان سوڭ شىمكەنتتەن استاناعا كوشىپ كەلگەن. ءۇش اي بۇرىن كۇيەۋى ولاردىڭ استاناداعى ءۇيىن تاۋىپ الىپ، ءىشىپ كەلىپ تاعى شۋ شىعارعان. سودان بەرى ايەل بالالارىمەن تۇرمىستا ءزابىر كورگەندەر پانالايتىن ورتالىقتا تۇرىپ ءجۇر. وسى ورتالىققا «حاباردىڭ» جۋرناليستەرى حابارلاسىپ، كۇيەۋىنەن تاياق جەگەن ءبىر ايەلدى تاۋىپ بەرۋدى سۇرايدى. ورتالىقتىڭ جەتەكشىسى اننا رىل «ايەلگە قارجىلاي كومەكتەسەتىندەر تابىلار» دەپ وسى كىسىمەن بايلانىستىرادى. «حاباردىڭ» تىلشىلەرى ايەلگە «ستۋديادا كۇيەۋىڭىز بولمايدى، ءتۇرىڭىزدى كورسەتپەيمىز، ماسكادا بولاسىز» دەپ ۋادە بەرگەن سوڭ، اپاي توك-شوۋعا بارۋعا كەلىسەدى. بىراق تىكەلەي ەفير كەزىندە بۇرىنعى كۇيەۋى ستۋدياعا كىرىپ كەلەدى. ايەلگە قالاي قورلاعانىن، قالاي تاياق جەگەنىن جۇرگىزۋشىلەر تاعى ايتقىزادى. جىلاپ وتىرىپ ايتىپ بەرەدى. كۇيەۋى «وتىرىك ايتپا، وتىرىك ايتپا» دەپ وتىر. «اق بولساڭ، ماسكاڭدى شەش، نەگە ماسكادا وتىرسىڭ؟» دەپ تيىسەدى. ايەل «قىزىم سۇرادى ماسكا كيۋدى» دەسە دە، شەشىپ تاستايدى" دەپ جازدى ول.
باعدارلاما جۇرگىزۋشىلەرى ەرلى-زايىپتىلاردى تاتۋلاستىرماق بولعان. ستۋدياعا گۇل الدىرىپ، كۇيەۋىنە بەرگىزىپ، بىتىمگە كەلتىرمەك نيەتتە ستۋديادا وتىرعان ساراپشىلاردى، نۋمەرولوگ، پسيحولوگتاردى سويلەتەدى. ولار جۇپتىڭ ءبىر-ءبىرىن ءتۇسىنىسۋى كەرەكتىگىن ايتادى. 19 جىل عۇمىرىن كۇيەۋىنەن تاياق جەۋمەن وتكىزگەن ايەلدىڭ سۇم تاعدىرعا كونۋىن "ميعا قونىمسىز" دەپ اتادى كوپشىلىك:
"توك-شوۋ ىستەدىك دەپ ءماز شىعارسىزدار، «حابارداعى» ارىپتەستەر. كەيىپكەرگە بەرگەن ۋادەدە تۇرماي، ەتيكانى بۇزعاندارىڭىز — بولەك اڭگىمە. سىزدەر ونسىز دا ءومىر بويى اۋىر پسيحولوگيالىق تراۆما العان، سودان ەمدەلىپ جۇرگەن ادامدى قورلاپ، ايەلگە ۇلكەن قاۋىپ توندىردىڭىزدەر. جىلدار بويى تاياق جەپ، كۇيەۋىنەن ءزابىر كورگەن ادامنىڭ نازىك، سەزىمتال پسيحيكاسىمەن بۇلاي وينايتىنداي سىزدەر كىمسىزدەر؟ توك-شوۋدان سوڭ ايەل ەس جيناي الماي، ۇزاق جىلادى دەيدى. وعان بىردەڭە بولسا، جاۋاپ بەرەسىزدەر مە؟! «حابارداعى» (ەركەك) جۇرگىزۋشى ەفير كەزىندە «تۇرمىستاعى زورلىققا ايەلدىڭ ءوزى جەتكىزەتىن شىعار، مۇمكىن شىداۋ كەرەك شىعار؟» دەگەندەي سۇراق قويادى. ساراپشى رەتىندە شاقىرىلعان نۋمەرولوگ (!) «ەركەككە ەركەلەۋ كەرەك، الدىنا ءتۇسىپ الماۋ كەرەك» دەگەندەي اقىل ايتادى. باسقالار دا ايەلدى تاتۋلاسۋعا شاقىرادى. ايتا بەرسەڭ كوپ... «حابار»، توك-شوۋ ىستەمەي-اق قويشى" دەپ قوستى دينا ەلگەزەك.
اتالمىش شىعارىلىمعا قوعام بەلسەندىسى، پروديۋسەر پەريزات مىرزاحمەت تە پىكىر ءبىلدىردى. ول باعدارلامانى "بيشىمباەۆ سياقتىلاردى اقتاۋعا ارنالعان جوبا" دەپ جازدى ءوزىنىڭ ينستا-ستوريسىندە:
"حابار ارناسىنىڭ "بىراق" دەگەن توك-شوۋى، پروديۋسەرلەرى، رەداكتورلارى، جۇرگىزۋشىلەرى قانشاما ايەلدىڭ بەتىنە تۇكىردى. رەيتينگ ءۇشىن ارزان ادىسكە بارۋ، جانى جارالى ايەلدى، بالالاردى قورلاۋ - ەلىمىزدەگى جۋرناليستيكانىڭ ايقىن بەينەسى. ادەتتەگىدەي توك-شوۋ ەمەس "بوق-شوۋ" ەكەندەرىن دالەلدەدى. بۇل بيشىمباەۆ سياقتىلاردى قولداۋعا ارنالعان جوبا. سوتپەن قاتار ەفيرگە شىعۋىنىڭ ءوزى بۇكىل ستسەناريدى اشىپ تۇر" دەپ جازدى ول.
رەزونانسقا قاتىستى «حابار» اگەنتتىگى» اق باسقارما توراعاسى كەمەلبەك ويشىباەۆ كەيىپكەرلەردەن، حالىقتان كەشىرىم سۇرادى:
ء"بىزدىڭ ارناداعى جاڭادان ەفيرگە شىعا باستاعان «بىراق...» الەۋمەتتىك توك-شوۋىنا قاتىستى كوڭىل ءبولىپ، ءۇن قوسىپ جاتقاندارىڭىزعا راحمەت. ءبىر نارسەنى تۇسىندىرە كەتەيىك. «بىراق...» باعدارلاماسىنىڭ ەفيرگە شىققانىنا 2 كۇن عانا بولدى. جوبانىڭ باستى ماقساتى – قوعامدى الاڭداتىپ وتىرعان الەۋمەتتىك ماسەلەلەر، تۇرمىستىق زورلىق-زومبىلىق، وتباسىلىق قۇندىلىقتار جانە باسقا وزەكتى ماسەلەلەردى كوتەرە وتىرىپ، سپيكەرلەر، پسيحولوگتار، زاڭگەرلەر مەن باسقا دا سالا ماماندارىمەن بىرلەسىپ، تالقىلاۋ جانە شەشۋ جولدارىن ىزدەۋ. كەشەگى ەفيردە ءبىر وتباسىنىڭ ماسەلەسىن كورسەتۋ ارقىلى، مۇمكىندىگىنشە ەرلى-زايىپتىلاردى تاتۋلاستىرىپ جىبەرۋدى كوزدەگەن ەدىك. وكىنىشكە قاراي، بۇل مۇمكىن بولمادى. سوندىقتان ءبىزدىڭ باعدارلاماعا قاتىسقان كەيىپكەرلەردەن دە، كورەرمەننەن دە كەشىرىم سۇرايمىز. الداعى ۋاقىتتا دا قوعامداعى وزەكتى ماسەلەلەردەن تىس قالمايمىز دەگەن ويدامىز" دەپ جازدى ول.
