ەل ىشىندە وتباسىنى ۇيىتىپ، ۇرپاق تاربيەلەپ قوعامنىڭ دامۋىنا ۇلەس قوسىپ جاتقان قاراپايىم ادامداردىڭ ورنى بولەك. ولاردىڭ ءار كۇنى ماراپاتقا لايىق.
جان جىلۋى، شەكسىز ماحاببات يەسىنە اينالعان ولار ىستىق ۇياسىمەن قوسا سۇيىكتى ماماندىق يەلەرى. مەيلى اۋىلدا تۇرسىن، مەيلى قالادا تۇرسىن – ولاردىڭ قوعامدا الار ورنى بولەك.
شارشامايتىن تىگىنشى
تىگىنشى ماماندىعىن يگەرگەن قۇتتىقىز تاستانوۆا – التى بالانىڭ اناسى. كۇنىنە ەكى مەزگىل سيىر ساۋىپ، قۇرت-ماي تاعى باسقا ءتۇرلى سۇت ونىمدەرىن ءوزى قولدان وڭدەپ، وسى ارقىلى كىشىگىرىم بيزنەسىندە دوڭگەلەتىپ وتىرعان جايى بار.
ونىمەن قوسا قۇتتىقىز حانىم ۇيىنە جاقىن ورنالاسقان ءتىس ەمحاناسىندا سانيتار قىزمەتىن اتقارادى.
قالعان ۋاقىتىن ۇيىندە بالالارىنىڭ جانىندا وتكىزەدى، ولارعا اس-اۋقاتىن بەرىپ، ساباقتارىن باقىلايدى. بوس ۋاقىت تاۋىپ تىگىنشىلىكپەن دە اينالىسادى. كەشكە قاراي داستارقان باسىنا بارلىق وتباسى مۇشەلەرى جينالعاندا، «وسىنداي جان بالقىتار جىلى ورتادا وتىرعاندا، بارلىق شارشاۋىم باسىلادى» دەيدى ول
ۇرپاقتاردى جالعاستىرعان ۇلى ۇستاز
جانار ازحودجاەۆا 37 جىل مەكتەپتە اياۋلى ۇستاز بولىپ قىزمەت اتقارعان. قازىر زەينەت جاسىنا شىعىپ، ءتاتتى نەمەرەلەرىن باعادى.
- مەن بالا كەزىمدە ءارتىس دە، ءبيشى دە، جۋرناليست تە بولعىم كەلگەن. بۇرىن تەلەفون جوق، تەلەديدار از كورەتىنبىز. سودان شىعار، كوپ ارتىستەردىڭ سۋرەتتەرىن جينايتىنبىز. اسىرەسە، ءبيشى شارا جيەنقۇلوۆانىڭ بيلەپ تۇرعان سۋرەتتەرى كوپ بولاتىن. بىراق، وقۋ بىتىرەر كەزىمدە، مەن مۇعالىم بولاتىنىمدى ناقتى ءبىلدىم، ۇستاز ماماندىعىن تاڭدادىم. وعان سەبەپ بولعان – اكەم جانە ورىس ءتىلى مەن فيزيكا پانىنەن بەرەتىن ۇستازدارىم. سولاردىڭ پانگە قىزىعۋشىلىق تانىتۋ قابىلەتىنە قاراپ، وقۋشىلاردىڭ ءتىلىن تاۋىپ، اقىل ايتىپ، كەڭەس بەرگەنى، قاراپايىمدىلىعى، بىلىمدىلىگى، ادامگەرشىلىگى وسىنىڭ ءبارى ماعان ۇلگى بولدى! اكەم “مۇعالىم بولساڭ، جامان ادام بولمايسىڭ” دەيتىن. مەكتەپتە 37 جىل ۇستاز بولىپ ىستەدىم. الدىمنان مىڭداعان وقۋشىلار ءوتتى. ءبارى دە ءار ءتۇرلى مىنەزدى، ءبىر-بىرىنە ۇقسامايدى. وقۋشىلارىمدى جاقسى كورەتىنمىن. ءبىلىم، تاربيە بەرۋدەن شارشامايتىنمىن. وقۋشىلارىم مەنى كورسە امانداسىپ، جاعدايىمدى سۇراپ تۇرادى. زەينەتكە شىقسام دا حابارلاسىپ، ىزدەپ، جازىپ تۇرادى. بۇگىندە وقۋشىلارىم جاقسى جۇمىس اتقارىپ ءجۇر، تۇرمىس قۇرىپ، وتباسىلى بولدى، بالالارى دا بار. ينستاگرام جەلىسىنەن كورسە مىندەتتى تۇردە جازادى، مەن بولسام، مارقايىپ، ءماز بولامىن، - دەيدى ول.
جانار حانىم قازىرگى ۇرپاقتىڭ ءوز ەرەكشەلىگى بار دەپ سيپاتتايدى.
- قازىرگى بالالار اقىلدى، پىسىق، ەركىن سويلەي الادى، العىر، ۇيالشاق ەمەس، ءبىر سوزبەن ايتقاندا - تۇلعا! ارينە ءبىزدىڭ بالالىق شاعىمىزبەن سالىستىرۋعا بولمايدى. قازىرگى زاماننىڭ بالالارى وتە دامىعان، مۇمكىندىگى كوپ. ءبىز جاس كەزىمىزدە دالادا وسكەنبىز، ويىن ويناپ، دوستارىمىزبەن كەزدەسىپ اڭگىمە ايتاتىنبىز، كىتاپ كوپ وقيتىنبىز، كينو، تەاترعا قىزىعۋشىلىق قاتتى بولاتىن. ۇيدە اكە-شەشەمىزبەن، اپكە-اعالارىمىزبەن قىزىقتى اڭگىمە ايتىپ، اجەمىز ەرتەگى ايتىپ وتىراتىن. ءار ءتۇرلى ويىندار وينايتىنبىز. ال قازىرگى بالالاردا قالاي؟ تەلەفوننان باسىن المايدى، اكە-اناسى دا كوپ ۋاقىتىن تەلەفوندا وتكىزەدى. بۇرىنعىداي قارىم-قاتىناس جاساپ، اشىق اڭگىمە ايتۋ جوعالىپ بارا جاتقانداي... – دەيدى جانار حانىم.
جاس ماماننىڭ جان قۋانىشى
ەمحانادا مەيىربيكە قىزمەتىن اتقاراتىن جاس مامان دينارا بەردىباەۆانىڭ بۇل سالادا ىستەپ جۇرگەنىنە 4 جىلدان اسقان. بۇل ماماندىقتى تاڭداۋىنا سەبەپكەر بولعان اكەسىنە شەكسىز العىسىن ايتىپ، قازىرگى كۇنى سونىڭ جەمىسىن كورۋدە.
- سىرقات جانىنا مەدەۋ ىزدەپ كەلگەن ادامداردىڭ ەمدەلگەننەن كەيىنگى جادىراعان ءجۇزىن كورۋ ەرەكشە باقىت، - دەيدى ول.
ۇجىمداعى ارىپتەستەرىمەن ءتۇرلى مەرەكەلەردە مەرەكەلىك داستارقان جايىپ، كوڭىلدى ۋاقىت وتكىزەدى.
بوس ۋاقىتىنىڭ كوپ بولا بەرمەيتىنىن ايتقان كەيىپكەرىمىز وتباسىندا انالىق، كەلىندىك قىزمەتتەردى دە اتقاراتىنىن ايتىپ اعىنان جارىلدى.
اياۋلى جار، مەيىرىمدى انا، پىسىق كەلىن بولىپ جۇرگەن دينارا بۇگىندە شەكسىز باقىتتى ەكەنىن ايتادى.
كاسىپتىڭ ءناسىبى
ماليكا تۇياقباەۆا – استانا قالاسىندا ءتۇرلى نان ونىمدەرىن شىعاراتىن جەكە مەنشىك زاۋىتتا جۇمىس جاسايدى. ول بۇل جۇمىسقا كەلۋىنە جولداس قىزى سەبەپ بولعانىن ايتادى. بۇل جەردە قۇربىسىمەن بىرگە جۇمىس جاساپ كەلە جاتقانىنا دا 5 جىلدىڭ ءجۇزى بولىپ قالىپتى. كەيىپكەرىمىز جۇمىسى وزىنە قاتتى ۇنايتىنىن جانە ونى ماحابباتپەن ورىندايتىنىن جەتكىزدى.
ۇجىمداستارىنىڭ اۋىزبىرشىلىگى تاماشا، جۇمىستا وتە كوڭىلدى ۋاقىت وتكىزىپ، جۇمىستىڭ قيىن ساتتەرىندە سەزبەي قالاتىنىن ايتادى. جۇمىس ۋاقىتى تاڭعى 8-دەن كەشكى 20:00 گە دەيىن. ەكى كۇن ىستەپ، ەكى كۇن دەمالعان كۇندەرىندە ماليكا حانىم ءتاپ-ءتاتتى نەمەرەلەرىمەن سەرۋەندەگەندى ۇناتادى ەكەن.
ادال ەڭبەكتىڭ يەسى
ۇلجامال يماناليەۆا – مەكتەپتە ۇستاز. بالالاردىڭ ءتىلىن تاۋىپ، ولارعا بار بىلگەن ءبىلىمىن ۇيرەتىپ جۇرگەن جاس مامان بۇل سالاعا قالاي كەلگەنىن ايتىپ بەردى.
- مەن مۇعالىم بولۋدى كىشكەنتاي كۇنىمنەن ارماندادىم، سەبەبى العاشقى ۇستازىم وتە كەرەمەت جانى جايساڭ جان بولاتىن. سول كىسىدەي ءبىلىمدى اپاي بولعىم كەلدى. سودان ينفورماتيكا پانىنەن پەداگوگيكالىق ينستيتۋتتى ءتامامداپ، شىمكەنت قالاسىنىڭ مەكتەپتەرىنەن جۇمىس قاراستىردىم. 2020 جىلدىڭ جاز ايلارىندا hr پروتسەستەن ۆاكانسيا قاراعان مەكتەپتەرگە ءوتىنىم تاستاپ، تەستتەن ءوتىپ ءبىر مەكتەپتىڭ مۇعالىمى اتاندىم. مەكتەپكە ءبىرىنشى كەلگەندە ارىپتەستەرىم مەن وقۋشىلار جاقسى قارسى الدى. تەز ۇيرەنىسىپ كەتتىم. كەيدە مەكتەپتىڭ بىتپەيتىن قاعازدارىنان شارشاپ كەتەتىن كەزدەرىمىز بولادى. ايتسە دە مەنىڭ جۇمىسىم وزىمە قاتتى ۇنايدى. بالالارعا بار بىلگەنىمدى ۇيرەتىپ، ساناسىنا سىڭدىرگىم كەلەدى، - دەيدى ۇلجامال حانىم.
ايگۇل ءجۇسىپ،
«ادىرنا» ۇلتتىق پورتالى
