مادەنيەت جانە اقپارات ءمينيسترى ايدا بالاەۆا قۋاندىق بيشىمباەۆتىڭ ىسىنە قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
ول Tengrinews.kz-كە بەرگەن سۇحباتىندا قازاقستانداعى مەديا نارىقتىڭ «تىيىم سالىنباعاننىڭ بارىنە رۇقسات» قاعيداسى بويىنشا جۇمىس ىستەيتىنىن ايتتى.
«ەلىمىزدە تسەنزۋراعا تىيىم سالىنادى، ال مەديا ويىنشىلار كوبىنە «تىيىم سالىنباعاننىڭ بارىنە رۇقسات ەتىلەدى» قاعيداتى بويىنشا جۇمىس ىستەيدى. جاقىندا جۋرناليستىك ەتيكاعا ارنالعان دوڭگەلەك ۇستەل وتكىزدىك جانە سول جەردە ءجۋرناليستىڭ ەتيكاسى ءوز-ءوزىن قاداعالاۋ شەگىندە بولۋى كەرەك دەگەن قورىتىندىعا كەلدىك. كورىپ وتىرعانىمىزداي، ءوزىن-ءوزى قاداعالاۋ دەگەن نارسە كوبىنە جۇمىس ىستەمەيدى. ءبىز مەحانيزمدەردى تۇسىنەمىز جانە بيشىمباەۆ ىسىندە بۇگىن بولىپ جاتقان مەديا ناۋقاننىڭ قالپىن كورىپ وتىرمىز. وكىنىشكە قاراي، تەرىس مۇددەنى باسشىلىققا الا وتىرىپ، بارلىق قابىلدانعان جالپىادامزاتتىق نورما مەن قاعيداعا قايشى، وتىرىك ءارى قوعامدىق سانانى مانيپۋلياتسيالاۋمەن اينالىساتىن ادامدار قوعامنان شەتتەتىلەدى. ويتكەنى قوعام اقىماق ەمەس»،—دەدى مينيستر.
ايتا كەتەيىك، بۇرىنعى ۇلتتىق ەكونوميكا ءمينيسترى قۋاندىق بيشىمباەۆقا ەكى باپ بويىنشا ايىپ تاعىلىپ وتىر:
- قازاقستان رەسپۋبليكاسى قىلمىستىق كودەكسىنىڭ 99-بابى، 2-بولىگى، 5-تارماعى – "اسا قاتىگەزدىكپەن جاسالعان ادام ءولتىرۋ، زاڭسىز قاساقانا بوتەن ادامنىڭ ولىمىنە اكەپ سوعۋ";
- قازاقستان رەسپۋبليكاسى قىلمىستىق كودەكسىنىڭ 110-بابى، 2-بولىگى، 1-تارماعى – "كىنالىگە ماتەريالدىق جاعىنان تاۋەلدى ادامعا جاسالعان جۇيەلى تۇردە ۇرىپ-سوعۋ نەمەسە وزگە دە كۇش قولدانۋ ارەكەتتەرى ارقىلى دەنە جانە پسيحيكالىق زارداپ كەلتىرۋ".
