اقتوبە قالاسىنىڭ № 2 سوتى شاھارداعى №55 مەكتەپ-گيمنازياسىنىڭ باس بۋحگالتەرىنە قاتىستى ۇكىم شىعاردى. بۇل تۋرالى انتيكوردىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
الدىن الۋ شارالارى شەڭبەرىندە سوت پروتسەسى اشىق رەجيمدە جۇرگىزىلدى.
سوت پروتسەسىنە ونلاين رەجيمدە ءبىلىم باسقارماسى مەن بولىمدەرىنىڭ قىزمەتكەرلەرى، ونىڭ ىشىندە اقتوبە وبلىسىنىڭ 403 قالالىق جانە اۋداندىق مەكتەپتىڭ ديرەكتورلارى، بۋحگالتەرلەرى، پەداگوگيكالىق قۇرامى قوسىلدى.
اقتوبە قالالىق مەكتەبىنىڭ باس بۋحگالتەرى اسا ءىرى مولشەردە بيۋدجەت قاراجاتىن جىمقىرعانى ءۇشىن سوتتالدى. ول 8 جىل بويى ءوزىنىڭ بانكتىك شوتىنا جالاقى رەتىندە زاڭسىز اۋدارىمدار جاساعان، ناتيجەسىندە مەملەكەتكە 413,8 ملن تەڭگە سوماسىندا زالال كەلتىرىلدى.
تەك ءبىر جىلدىڭ ىشىندە ول وزىنە 200 ملن تەڭگەدەن استام قاراجات اۋدارعان، بۇل بۇكىل مەكتەپتىڭ جىلدىق ەڭبەكاقى قورىنىڭ 30% -ىن قۇرايدى.
سوت ۇكىمىمەن وعان 7 جىل باس بوستاندىعىنان ايىرۋ جازاسى تاعايىندالدى، سونداي-اق 10 جىل مەرزىمگە ماتەريالدىق جاۋاپتى لاۋازىمداردى اتقارۋ قۇقىعىنان ايىرىلدى.
ۇكىم زاڭدى كۇشىنە ەنگەن جوق.
