پرەزيدەنت قحر مەملەكەتتىك كەڭەسى پرەمەرىنىڭ ورىنباسارى دين سيۋەسياندى قابىلدادى. بۇل تۋرالى اقوردا مالىمدەدى، دەپ حابارلايدى “ادىرنا” ۇلتتىق پورتالى.
كەزدەسۋ بارىسىندا قازاق-قىتاي ستراتەگيالىق سەرىكتەستىگىنىڭ جاي-كۇيى جانە ونى دامىتۋ پەرسپەكتيۆاسى، پرەزيدەنت قاسىم-جومارت توقاەۆ پەن قحر توراعاسى سي ءتسزينپيننىڭ بۇعان دەيىن قول جەتكىزگەن ۋاعدالاستىقتارىن ەكى ەل ۇكىمەتتەرىنىڭ ىسكە اسىرۋ بارىسى تالقىلاندى.
قىتايمەن ەكىجاقتى قاتىناستى مۇلدە جاڭا دەڭگەيگە كوتەرۋ قازاقستاننىڭ ماڭىزدى ستراتەگيالىق باسىمدىعى سانالادى. شىن مانىندە، قازاق-قىتاي بايلانىستارى ءوزارا ءتيىمدى مەملەكەتارالىق ىقپالداستىقتىڭ ۇلگىسىن كورسەتەدى دەپ ويلايمىن. ءبىز قىتايدى وتە ماڭىزدى ستراتەگيالىق سەرىكتەس رەتىندە قاراستىرامىز جانە بارلىق سالاداعى ىنتىماقتاستىقتا ناقتى ناتيجەگە قول جەتكىزەتىنىمىزگە ۇلكەن ءۇمىت ارتامىز، – دەدى قاسىم-جومارت توقاەۆ.
مەملەكەت باسشىسى جۋىردا وتكەن جوعارى دەڭگەيدەگى ءۇشىنشى «ءبىر بەلدەۋ، ءبىر جول» فورۋمى وراسان زور تابىستى بولعانىن جانە قحر توراعاسى سي ءتسزينپيننىڭ اۋقىمدى باستاماسىنىڭ ودان ءارى دامۋ جولىن ايقىنداعانىن ەسكە سالدى. پرەزيدەنتتىڭ ايتۋىنشا، قازاقستان بۇل جوبانى جۇزەگە اسىرۋعا جان-جاقتى اتسالىسا بەرەدى.
وزىڭىزگە ءمالىم، مەن جاقىندا بەيجىڭگە رەسمي ساپارمەن بارىپ، توراعا سي تسزينپينمەن جان-جاقتى كەلىسسوزدەر جۇرگىزدىم. جوعارى دەڭگەيدەگى كەلىسسوزدەر وتە مازمۇندى بولدى جانە ىنتىماقتاستىقتى نىعايتۋ جولىنداعى ماڭىزدى كەزەڭگە جول اشتى. ءوزارا ۆيزاسىز رەجيم كۇشىنە ەندى. كەلەسى جىل قازاقستاننىڭ قىتايداعى تۋريزم جىلى بولىپ جاريالاندى. بۇل ءوزارا قارىم-قاتىناس، اسىرەسە جاستار ءۇشىن وتە ماڭىزدى شەشىم دەپ سانايمىن. قىتايمەن اراداعى ىنتىماقتاستىقتى دامىتۋ ءاربىر ەلدىڭ باسىمدىقتارىنىڭ ءبىرى ەكەنىن تاعى دا اتاپ وتكىم كەلەدى. ءبىز بۇل ماسەلەگە جوعارى دەڭگەيدە ءمان بەرەمىز، – دەدى مەملەكەت باسشىسى.
بۇدان بولەك، پرەزيدەنت بۇگىن استانادا وتكەن قازاقستان مەن قىتايدىڭ ىنتىماقتاستىق جونىندەگى كوميتەتىنىڭ 11-وتىرىسى ساۋدا-ەكونوميكا سالاسىنداعى بىرلەسكەن ءىس-قيمىلداردى ازىرلەۋ ىسىندە ماڭىزدى ءرول اتقاراتىنىنا توقتالدى.
ءوز كەزەگىندە دين سيۋەسيان قاسىم-جومارت توقاەۆقا قحر توراعاسى سي ءتسزينپيننىڭ سالەمىن جەتكىزىپ، ەكى جاقتى ىقپالداستىقتىڭ دامۋ قارقىنىنا كوڭىلى تولاتىنىن ايتتى.
ءبىز مەملەكەتتەر باسشىلارىنىڭ ۋاعدالاستىقتارىن ىسكە اسىرۋ ارقىلى ءوزارا ىنتىماقتاستىقتا جاڭا ناتيجەگە ۇدايى قول جەتكىزۋدى ماقسات ەتەمىز. قىتاي قازاقستاننىڭ مەملەكەتتىك قۇرىلىس سالاسىنداعى وراسان زور جەتىستىكتەرىنە شىن جۇرەكتەن قۋانادى. قىتاي-قازاقستان قاتىناستارىنىڭ تابىستى دامۋى ءبىزدىڭ ورتاق مۇددەمىزگە تولىق ساي كەلەدى، سونداي-اق وڭىردەگى بەيبىتشىلىك پەن تۇراقتىلىققا ىقپال ەتەدى. قىتاي تاراپى مەملەكەتتەر باسشىلارىنىڭ قول جەتكىزگەن ۋاعدالاستىقتارىن جانە «ءبىر بەلدەۋ، ءبىر جول» باستاماسىن جوعارى دەڭگەيدە ءارى ساپالى تۇردە بىرلەسىپ جۇزەگە اسىرۋعا دايىن، – دەدى قحر مەملەكەتتىك كەڭەسى پرەمەرىنىڭ ورىنباسارى.
كەزدەسۋ بارىسىندا ساۋدا، اۋىل شارۋاشىلىعى، ينۆەستيتسيا، كولىك، لوگيستيكا، ەنەرگەتيكا جانە باسقا دا سالالارداعى ءوزارا ىقپالداستىقتى نىعايتۋ ماسەلەلەرى قاراستىرىلدى. سونىمەن قاتار ەكى ەل اراسىنداعى مادەني-گۋمانيتارلىق ىنتىماقتاستىقتى دامىتۋدىڭ وزەكتىلىگى اتاپ ءوتىلدى.
