وسكەمەندە مەكتەپ ديرەكتورى مۇعالىمدى ەدەن جۋعا ماجبۇرلەگەن. بۇل تۋرالى وقۋ-اعارتۋ مينيسترلىگى ءبىلىم سالاسىندا ساپانى قامتاماسىز ەتۋ كوميتەتىنىڭ توراعاسى ەرنۇر داۋەنوۆ مالىمدەدى، دەپ حابارلايدى “ادىرنا” ۇلتتىق پورتالى.
“پەداگوگتەردى مۇعالىمگە ءتان ەمەس فۋنكتسيالارعا تارتۋ پروبلەماسى دا وزەكتىلىگىن جوعالتپاي تۇر. بۇگىندە ءبىزدىڭ دەپارتامەنتتەردە بارلىعى 182 فاكتى تىركەلگەن. ونىڭ 93-ءى بويىنشا اكىمشىلىك ءىس قوزعالسا، 100 فاكتى اۋماقتىق دەپارتامەنتتەر جانىنداعى كونسۋلتاتيۆتىك كەڭەسشى ورگانداردا قارالىپ جاتىر”، - دەدى كوميتەت توراعاسى.
سونداي-اق، ول وسى اپتادا ءوز اتىنا شقو وسكەمەن قالاسى №46 مەكتەبىنىڭ پەداگوگىنەن ارىز تۇسكەنىن ايتتى.
“مەكتەپ ديرەكتورى مۇعالىمدى ەدەن جۋعا ماجبۇرلەگەن. قازىر وسى فاكتى بويىنشا ءتيىستى جۇمىس ءجۇرىپ جاتىر. مەكتەپ باسشىلىعىنىڭ كىناسى دالەلدەنگەن جاعدايدا اكىمشىلىك جازا قولدانىلادى”، - دەدى ەرنۇر داۋەنوۆ.
