تەحاستا تۋىپ-وسكەن ماريون لۋنا برەم 17 جاسىندا اسكەري ادامعا كۇيەۋگە شىعادى. ءبىر جىلدان سوڭ تۇڭعىش ۇلى، بەس جىلدان سوڭ ەكىنشى ۇلى دۇنيە ەسىگىن اشتى. امەريكالىق وتباسى تاتۋ-ءتاتتى ءومىر سۇرەدى.
1984 جىلى لۋنا برەم 30 جاسقا تولادى. وكىنىشكە قاراي، كەيىپكەرىمىزدە ەكى جاقتى ونكولوگيا انىقتالىپ، ول بىرنەشە وتا جاساتادى (گينەكولوگيالىق جانە انارىن الىپ تاستاۋ بويىنشا). وسىدان كەيىن حيميوتەراپيا باستالادى. سونىڭ سالدارىنان ماريون تاز بوپ قالادى. دارىگەرلەر وعان ەكى-ءۇش جىلدىق ءومىرىڭ قالدى دەپ بولجام ايتادى. كۇيەۋى بار قيىندىقتى كورە تۇرىپ، ماريوندى تاستاپ كەتەدى. ۇلدارىنىڭ ۇلكەنى 12-دە، كىشىسى 7-دە بولادى. ەشقاشان جۇمىس ىستەمەگەن جاس كەلىنشەك جالعىز قالادى. ونىڭ ۇستىنە وتاعا تولەنەتىن ءبىراز قارجى موينىنا قارىز بولىپ ىلىنەدى.
ءۇي تىرلىگىنەن اسىپ ەشتەڭە ىستەپ كورمەگەن ايەل بالالارىن قالاي اسىرايمىن دەپ ويلانادى. ءبىر كۇنى باسى قاتتى اۋىرىپ، ۆاننادا ۇستاماسى ۇستاپ قالادى. ءسويتىپ جاتقاندا اسۇيدەن ۇلدارىنىڭ كۇلگەن داۋىسىن ەستيدى. سول ساتتە ميىندا ءبىر نارسە قوسىلادى. قايتسەم دە دەرتىمنەن ساۋىعامىن دەپ ورنىنان تۇرادى.
ماريون كولىك ساتۋدان جاقسى تابىس تابۋعا بولاتىنىن جاقسى بىلەتىن. ول اۆتوديللەرلەرگە بارىپ ءوز قىزمەتىن ۇسىنادى. بىراق بۇل سالادا تەك ەر ادامدار عانا جۇمىس ىستەيتىنىن بايقايدى. ول ەكى اپتا ىشىندە 16 ادامنان جوق دەگەن جاۋاپ الادى. ستراتەگياسىن اۋىستىرماسا ءۇمىتى ۇزىلەتىنىن سەزگەن ول 17-ءشى رەت جۇمىس سۇراۋدىڭ ورنىنا جۇمىس بەرۋشىگە: «سەنىڭ كومپانياڭ ماعان مۇقتاج، مەنى الساڭ، تابىسقا كەنەلەسىڭ» دەپ كەسىپ ايتادى. ونى جۇمىسقا الادى.
ول كولىك ساتۋشى ايەل رەتىندە ەرلەرگە قاراعاندا ءبىرشاما ارتىقشىلىعىن سەزىنەدى. كولىك الۋعا كەلگەندەردىڭ جۇبايلارىنا قانداي كولىك الۋ قاجەتىن ءتۇسىندىرىپ وتىرادى. ال ەركەك ساتۋشىلار كوبىنە كۇيەۋلەردى ساتىپ الۋعا كوندىرۋگە تىرىساتىن-دى.
العاشقى ەڭبەك جىلى لۋنا برەم جىل ساتۋشىسى دەگەن اتاقتى الادى. وعان ەرلەر تاعاتىن رولەكس ساعاتىن قوسىپ بەرەدى. ونى تەك ەر ادامدارعا عانا بەرەدى ەكەن. سول ساتتە دارىگەرلەر ونىڭ ونكولوگياسى رەميسسياعا تۇسكەنىن حابارلايدى. ماريون كۇش جيناي باستايدى.
ودان كەيىنگى ەكى جىل وتە تابىستى بولادى. ول ءوزىن باستىق ەتىپ قويۋدى ۇسىنادى. بىراق جۇمىس بەرۋشى «سەن كولىك ساتۋدان كەتسەڭ، پايدا تۇسپەي قالادى» دەپ ونىڭ ۇسىنىسىن قابىلداماي تاستايدى.
بىراق ماريون جاڭا جۇمىس ىزدەۋگە شىعادى. ەكى اپتادان سوڭ باسقا ءبىر اۆتوديللەر ونى ءوزى قالاعان لاۋازىمعا جۇمىسقا الادى. سودان باستاپ ونىڭ لاۋازىمى كۇن وتكەن سايىن وسە بەرەدى.
تاعى ەكى جىل وتكەندە ءوزى دە اۆتوديللەر بولۋعا قارجى جيناۋدى باستايدى. بار-جوعى $800 000 جەتپەي تۇردى. بۇل ول ءۇشىن تۇسكە كىرەتىن سوما بولاتىن. ماريون تاعى دا ويلانادى. بىراق بىلەك سىبانا كىرىسەدى. بيزنەس-جوسپار جازىپ، وعان ءوزىنىڭ ءومىربايانىن قوسىپ، ينۆەستور تاۋىپ بەرەتىن 50 اۋديتورلىق كومپانياعا تاراتادى.
ەكى اپتادان سوڭ ينۆەستور تابىلادى. لۋنا برەم ءوزىنىڭ اۆتوسالونىن اشادى. Chrysler كولىكتەرىن ساتۋمەن شۇعىلدانادى. ءسويتىپ، 1989 جىلى جۇرەك تاعىلعان «Love Chrysler» ساۋداعا شىعادى. «بۇل جاي جۇرەك ەمەس، بۇل ءبىزدىڭ ادامداردىڭ جۇرەگى، ءبىز تەحاسقا ماحابباتىمىزدى ارنايمىز» دەگەن ۇرانمەن ءوز ءىسىن باستايدى.
ماريوننىڭ تالپىنىسى ەسەلەپ قايتتى. بۇگىندە ونىڭ وبىرى جازىلدى. ەكى اۆتوسالونى بار. جىلدىق اينالىمى $45 ملن. دوللار. كىتاپ جازۋدى ۇناتادى. وتىز جاسىندا كۇردەلى وتا جاساتۋى، كۇيەۋى تاستاپ كەتۋى بار، دارىگەرلەر ولەدى دەپ كۇن ساناعان ادام ەمدەلىپ، ءوز ءىسىن باستاپ، ميلليونداپ تابىس تاپقانى تاڭقالارلىق جاعداي ما؟ ارينە!
ول ۇلدارىنىڭ داۋىسىن ەستىپ، ءوز ءومىرىن قولعا الدى. ارزان پاريك كيىپ، ەرلەردىڭ الەمىنە قادام باستى. ۇلدارىنا بۇرىن-سوڭدى بەرە الماعان باقىتتى بالالىق شاق سىيلادى.
«كەيدە جاي ەسىك قاعۋ ازدىق ەتەدى. كەيدە ەسىكتى سىندىرىپ كىرۋ كەرەك» دەيدى ماريون.
اۋدارعان شىنار ءابىلدا
"ادىرنا" ۇلتتىق پورتالى
