اتىراۋ وبلىسىندا سىنىپتاستارىنىڭ قولىنان قازا بولعان 27 جاستاعى جىگىتتىڭ اناسى ادىلدىك ىزدەيدى. بۇل تۋرالى Almaty.tv جاريالادى، دەپ حابارلايدى “ادىرنا” ۇلتتىق پورتالى.
جىلىوي اۋدانى، شوقپارتوعاي اۋىلىنىڭ تۇرعىنى ايگۇل قيىقوۆا 13 تامىزدا ۇلىن جەر قوينىنا تاپسىردى. كۇندىز كۇلكىدەن، تۇندە ۇيقىدان ايىرىلعان انا بالامنىڭ ءوز سىنىپتاستارىنىڭ قولىنان قازا بولعانى قاتتى قىنجىلتادى دەپ زار ەڭىرەپ وتىر. ايتۋىنشا، سول كۇنى ۇلى دوستارىمەن تۋعان كۇن كەشىنە كەتكەن ەكەن. ءتىپتى ءبىر شارۋالارىمەن كومەكتەسپەك بولىپ تاڭەرتەڭ ەرتە شىعىپتى. ۇيىمە ەرتە قايتامىن دەگەن بالاسىن ىشىمدىككە سىلقيا تويىپ العان سىنىپتاستارى جىبەرگىسى كەلمەي، اياۋسىز سوققىعا جىققانىن ايتادى.
«كەتىپ بارا جاتقان جەرىنەن ماناس سەن قايدان شىعاردىڭ دەپ، نۇرسۇلتاندى ۇرعان سەن دە جونىڭە وتىرماي، نە مەنىڭ تۋعان كۇنىمدە سەن كومەك سۇرايتىن كىم ەدىڭ دەپ ءسويتىپ توبەلەسكەن. سودان، ماناس سالىقباي نۇرسۇلتاندى ۇرعان، سودان كەيىن ەرناردى ۇرعان. سوسىن كەتىپ بارا جاتقان مەنىڭ ۇلىمنىڭ قۋ جەلكەسىنەن قاتتى اۋىر زاتپەن ۇرعان. نە تاس، نە تەمىر»، – دەدى مارقۇمنىڭ اناسى ايگۇل قيىقوۆا.
وقيعا ورنىنا جەتكەن پوليتسيا قىزمەتكەرلەرى سىنىپتاستارىن بولىمشەگە الىپ كەتكەن. ال ەرتەسى تەك ءبىر كۇدىكتى قالىپ، قالعانى بوستاندىققا جىبەرىلىپتى. تەرگەۋگە الىنعانداردىڭ ايتۋىنشا، باسىنان سوققى العان بويدا مارقۇم سول جەردە قۇلاعان كورىنەدى. ال ساراپتاما قورىتىندىسى ونىڭ بىرنەشە رەت سوققى العانىن دالەلدەگەن.
«قۇلاقتان سوققان، جەلكەسىنەن سوققان، باسىندا سوققى كوپ دەيدى. ونى قۇلاعاننان كەيىن تاعى سوققان سياقتى. سوندا بۇگىنگى تاڭدا شولمەكپەن ۇرعان بالا قاماۋدا وتىر دا، ال باعاناعى تاسپەن ۇرىپ ولتىرگەن بالا تاسىن دا، تەمىرىن دە جوق قىلىپ جىبەرگەن. ول بالا بوستاندىقتا ءجۇر جانە سونى كورگەن 4 بالا دا بوستاندىقتا ءجۇر»، – دەدى مارقۇمنىڭ اناسى.
اۋدانداعى تەرگەۋشىلەرگە سەنبەي، وبلىستىق پوليتسيا دەپارتامەنتىنە بارىپ ءىستىڭ تولىقتاي اشىلۋىن تالاپ ەتكەن انا «جازىقسىزدار قامالىپ، قىلمىس جاساعاندار جاۋاپكەرشىلىكتەن جالتارىپ كەتپەسە ەكەن» دەيدى. ول سول تۋعان كۇن كەشىندە بولعانداردىڭ بارلىعىنىڭ تولىق تەرگەۋگە ىلىگۋىن سۇرايدى. ال دەپارتامەنت وكىلدەرىنىڭ ايتۋىنشا، تەرگەۋ بارىسىندا ءالى تالاي وزگەرىس بولىپ، جازاعا تارتىلاتىندار سانى ارتۋى مۇمكىن.
«قك 106-بابى، 3-بولىگى، ياعني دەنساۋلىققا قاساقانا اۋىر زيان كەلتىرۋ بابى بويىنشا تەرگەۋ امالدارىن جۇرگىزىلىپ جاتىر. 1995 جىلى تۋىلعان كۇدىكتى قازىر قاماۋدا. ءتيىستى ساراپتامالار تاعايىندالدى. وزگە اقپارتتى قازىر قىلمىستىق پروتسەسستىك كودەكستىڭ 201-بابىنا سايكەس، تاراتا المايمىز. كۇدىكتىلەردىڭ سانى نەمەسە وزگە دە قىلمىسقا قاتىستى اقپارتتار تەرگەۋ بارىسىندا وزگەرۋى مۇمكىن»، – دەدى پوليتسيا دەپارتامەنتىنىڭ ءباسپاسوز حاتشىسى مەيىرىم ەرداۋلەت.
“ادىرنا” ۇلتتىق پورتالى
