اقش پرەزيدەنتى دونالد ترامپ يرانداعى جاپپاي نارازىلىقتارعا بايلانىستى قاتاڭ مالىمدەمە جاساپ، ەلدىڭ جوعارعى كوشباسشىسى اياتوللا ءالي حامەنەيگە بيلىكتەن كەتۋىن تالاپ ەتتى. ول يرانداعى نارازىلىق بىلدىرۋشىلەردىڭ جاپپاي قازا تابۋى مەن ەلدەگى كۇيزەلىس ءۇشىن جاۋاپكەرشىلىكتى تىكەلەي حامەنەيگە جۇكتەدى.
«يراندا جاڭا باسشىلىقتى ىزدەيتىن ۋاقىت كەلدى. ونىڭ (حامەنەي — رەد.) ومىرىندە قابىلداعان ەڭ دۇرىس شەشىمى — ەكى كۇن بۇرىن 800-دەن استام ادامدى دارعا اسۋعا بارماعانى»، — دەدى ترامپ Politico باسىلىمىنا بەرگەن پىكىرىندە.
بۇل مالىمدەمە بيلىكتەگى رەجيمنىڭ وتستاۆكاسىن تالاپ ەتكەن جاپپاي نارازىلىقتاردىڭ باسەڭدەگەنى تۋرالى حابارلار اياسىندا ايتىلدى.
ترامپتىڭ بۇل ءسوزى حامەنەي X الەۋمەتتىك جەلىسىندە اقش پرەزيدەنتىنە قارسى بىرقاتار قاتاڭ مالىمدەمە جاريالاپ، يرانداعى زورلىق-زومبىلىق پەن تارتىپسىزدىكتەر ءۇشىن ونى ايىپتاعاننان كەيىن ايتىلدى.
ء«بىز اقش پرەزيدەنتىن يران حالقىنا كەلتىرىلگەن قۇرباندار، زالال مەن جالا ءۇشىن كىنالى دەپ سانايمىز»، — دەپ جازدى حامەنەي.
باسقا ءبىر جازباسىندا ول ترامپتى زورلىق-زومبىلىق جاسايتىن توپتاردى يران حالقىنىڭ وكىلدەرى رەتىندە كورسەتىپ وتىر دەپ ايىپتادى.
اق ءۇي باسشىسى ءوز كەزەگىندە «تەگەرانداعى بيلىك رەپرەسسيا مەن زورلىققا سۇيەنىپ وتىرعانىن» اتاپ ءوتتى.
ايتا كەتسەك، اياتوللا ءالي حامەنەي يراندى 37 جىلدان بەرى باسقارىپ كەلەدى جانە ەلدىڭ ساياسي ءارى ءدىني جۇيەسىندەگى نەگىزگى تۇلعا سانالادى. يراننىڭ رەسمي بيلىگى ترامپتىڭ مالىمدەمەسىنە ازىرگە پىكىر بىلدىرگەن جوق.
بۇعان دەيىن، 13 قاڭتاردا، اقش پرەزيدەنتى دونالد ترامپ يراندىقتاردى نارازىلىقتى جالعاستىرۋعا، «ينستيتۋتتاردى باسىپ الۋعا»، سونداي-اق «ولتىرۋشىلەر مەن ءزابىر كورسەتكەندەردىڭ» ەسىمدەرىن تىركەۋگە شاقىرىپ، ولاردىڭ «ۇلكەن باعا تولەيتىنىن» مالىمدەگەن بولاتىن.
«نارازىلىق بىلدىرۋشىلەردى ماعىناسىز ءولتىرۋ توقتاتىلعانعا دەيىن يراندىق شەنەۋنىكتەرمەن بارلىق كەزدەسۋلەردى توقتاتتىم. كومەك جولدا»، – دەپ جازدى ترامپ 13 قاڭتاردا ءوزىنىڭ Truth Social الەۋمەتتىك جەلىسىندە.
كەلەسى كۇنى، 14 قاڭتاردا، ترامپ وزىنە يرانداعى كىسى ولتىرۋلەردىڭ «باسەڭدەگەنى» تۋرالى حابارلانعانىن ايتتى. الايدا نارازىلىققا قاتىسۋشىلار مۇنى اقش پرەزيدەنتىنىڭ «ساتقىندىعى» دەپ باعالادى.
«وتە ماڭىزدى دەرەككوز بىزگە ەكىنشى تاراپتان يرانداعى ءولىم جازالارى توقتاتىلعانىن حابارلادى. بۇل راس پا، جوق پا – انىقتايمىز. سولاي بولعانىنا ۇمىتتەنەمىن»، – دەدى ترامپ جۋرناليستەرگە. الايدا ول بۇل اقپارات كوزدەرىن ناقتى اتامادى.
اقش-تىڭ يرانعا قارسى اسكەري ارەكەتتەرى قاراستىرىلىپ جاتىر ما دەگەن سۇراققا جاۋاپ بەرگەن ترامپ مۇمكىن بولاتىن اسكەري قيمىلداردى جوققا شىعارماي، ء«بىز پروتسەستى باقىلاپ وتىرامىز» دەپ مالىمدەدى.
