وزبەكستاننىڭ سىرتقى ساياسات تۇجىرىمداماسى قايتا قاراۋدى جانە باسىم باعىتتاردى جاڭارتۋدى قاجەت ەتەدى. بۇل تۋرالى پرەزيدەنت شاۆكات ميرزيوەۆ مالىمدەدى، دەپ حابارلايدى “ادىرنا”.
«جاڭا تۇجىرىمداما مەملەكەتىمىزدىڭ ۇزاق مەرزىمدى ستراتەگيالىق ماقساتتارىن، جۇرگىزىلىپ جاتقان ىشكى رەفورمالاردىڭ لوگيكاسىن، سونداي-اق ەكونوميكالىق ديپلوماتيا، قاۋىپسىزدىك جانە ينۆەستيتسيالار سالاسىنداعى ۇلتتىق مۇددەلەرىمىزدى كەشەندى تۇردە ءارى ءوزارا بايلانىستا كورسەتۋى ءتيىس»، — دەدى ميرزيەيوۆ.
ونىڭ ايتۋىنشا، جاڭا سىرتقى ساياسي باعدارلاما تاشكەنتتىڭ ساۋدا، لوگيستيكا جانە سۋ رەسۋرستارى سالالارىنداعى مۇددەلەرىن دە ەسكەرۋى قاجەت. وسى ماقساتتا ءاربىر ديپلوماتيالىق وكىلدىككە قوسىمشا قارجىلاندىرۋ بولىنەدى.
ەسكە سالا كەتەيىك، وزبەكستان سىرتقى ساياسات تۇجىرىمداماسىن 2012 جىلدىڭ كۇزىندە قابىلداعان. قۇجاتقا سوڭعى وزگەرىستەر 2019 جىلى ەنگىزىلگەن.
وزبەكستان ۇلتتىق مۇددەلەرىنە ساي حالىقارالىق وداقتارعا دەربەس تۇردە كىرۋگە جانە ولاردان شىعۋعا قۇقىلى. سونىمەن قاتار ەل اسكەري اليانستارعا قوسىلمايتىن بەيبىت ساياسات ۇستانادى.
وسى رەتتە وزبەكستان ءوز اۋماعىندا شەتەلدىك اسكەري بازالاردىڭ ورنالاستىرىلۋىنا جول بەرمەيدى، ال وزبەكستان رەسپۋبليكاسىنىڭ قارۋلى كۇشتەرى تەك ەگەمەندىك پەن حالىقتىڭ قاۋىپسىزدىگىن قورعاۋعا ارنالعان.
