بەلسەندى ءارى بلوگەر ميربولات مىرزاتايۇلى الماتىدان تاراز قالاسىنداعى تۇزەۋ مەكەمەسىنە اۋىستىرىلدى، دەپ حابارلايدى "ادىرنا" ۇلتتىق پورتالى.
ادام قۇقىقتارىن قورعاۋ بيۋروسىنىڭ مالىمەتىنشە، قوعام بەلسەندىسى اپەللياتسيالىق سوتتىڭ قاۋلىسى شىقپاي تۇرىپ تارازداعى اباقتىعا جەتكىزىلگەن.
ميربولات مىرزاتايۇلىنىڭ جۇبايىنىڭ ايتۋىنشا، 12 قاڭتارعا قاراعان ءتۇنى بەلسەندى الماتىداعى تەرگەۋ يزولياتورىنان اكەتىلىپ، تاراز قالاسىنداعى №67 مەكەمەگە ورنالاستىرىلعان.
ال قورعاۋشىسى جانار بالعاباەۆانىڭ سوزىنشە، بۇل ارەكەت زاڭعا قايشى.
«بلوگەرگە قاتىستى اپەللياتسيالىق شاعىم ءالى قارالعان جوق. زاڭعا سايكەس، ءبىرىنشى ساتىداعى سوت ۇكىمىنەن كەيىن سوتتالۋشىنىڭ قالالىق سوتقا شاعىمدانۋعا قۇقىعى بار. اپەللياتسيا قارالىپ، ۇكىم كۇشىندە قالسا عانا جازاسىن وتەۋ مەكەمەسىنە اۋىستىرىلادى. ميربولات مىرزاتايۇلى مەن ونىڭ قورعاۋشىسى ءتورت جىلعا باس بوستاندىعىنان ايىرۋ جازاسىنا كەلىسپەي، الماتى قالالىق سوتىنا شاعىم تۇسىرگەن. سوندىقتان اپەللياتسيالىق پروتسەسس اياقتالعانعا دەيىن ول الماتىدا قالۋى ءتيىس ەدى»، – دەپ جازدى بيۋرو.
سونداي-اق، قۇقىق قورعاۋشىلاردىڭ حابارلاۋىنشا، الەۋمەتتىك جەلىلەردە «ميربولاتتىڭ سوتىنا مىڭ ادام قاتىسامىز» دەگەن باستاما كوتەرىلگەن. الايدا بۇل ناۋقاننىڭ بەلسەندىنىڭ تارازعا اۋىستىرىلۋىنا قاتىسى بار-جوعى ازىرگە بەلگىسىز.
