Belsendı ärı bloger Mirbolat Myrzataiūly Almatydan Taraz qalasyndaǧy tüzeu mekemesıne auystyryldy, dep habarlaidy "Adyrna" ūlttyq portaly.
Adam qūqyqtaryn qorǧau biurosynyŋ mälımetınşe, qoǧam belsendısı apelliasiialyq sottyŋ qaulysy şyqpai tūryp Tarazdaǧy abaqtyǧa jetkızılgen.
Mirbolat Myrzataiūlynyŋ jūbaiynyŋ aituynşa, 12 qaŋtarǧa qaraǧan tünı belsendı Almatydaǧy tergeu izoliatorynan äketılıp, Taraz qalasyndaǧy №67 mekemege ornalastyrylǧan.
Al qorǧauşysy Janar Balǧabaevanyŋ sözınşe, būl äreket zaŋǧa qaişy.
«Blogerge qatysty apelliasiialyq şaǧym älı qaralǧan joq. Zaŋǧa säikes, bırınşı satydaǧy sot ükımınen keiın sottaluşynyŋ qalalyq sotqa şaǧymdanuǧa qūqyǧy bar. Apelliasiia qaralyp, ükım küşınde qalsa ǧana jazasyn öteu mekemesıne auystyrylady. Mirbolat Myrzataiūly men onyŋ qorǧauşysy tört jylǧa bas bostandyǧynan aiyru jazasyna kelıspei, Almaty qalalyq sotyna şaǧym tüsırgen. Sondyqtan apelliasiialyq prosess aiaqtalǧanǧa deiın ol Almatyda qaluy tiıs edı», – dep jazdy biuro.
Sondai-aq, qūqyq qorǧauşylardyŋ habarlauynşa, äleumettık jelılerde «Mirbolattyŋ sotyna myŋ adam qatysamyz» degen bastama köterılgen. Alaida būl nauqannyŋ belsendınıŋ Tarazǧa auystyryluyna qatysy bar-joǧy äzırge belgısız.
