يران ازاماتتىق ۇشاقتار ءۇشىن ءوز اۋە كەڭىستىگىن جابۋ تۋرالى رەسمي حابارلاما تاراتتى. بۇل وزگەرىس تەك ارنايى رۇقساتپەن ەلگە كىرەتىن نەمەسە ەلدەن شىعاتىن حالىقارالىق رەيستەرگە عانا قولدانىلادى، دەپ حابارلايدى «ادىرنا» ءتىلشىسى Flightradar24 سەرۆيسىنە سىلتەمە جاساپ.
تەگەراننىڭ مۇنداي شەشىم قابىلداۋىنا نە سەبەپ بولعانى ناقتىلانبادى.
بۇعان دەيىن گەرمانيا بيلىگى ءوز اۋە كومپانيالارىنا يراننىڭ اۋە كەڭىستىگىن پايدالانباۋعا كەڭەس بەرگەن ەدى. ال ۇلىبريتانيا بيلىگى ەلدەگى جالعاسىپ جاتقان تارتىپسىزدىكتەرگە بايلانىستى تەگەرانداعى ەلشىلىگىن ۋاقىتشا جاۋىپ، قىزمەتكەرلەرىن ەۆاكۋاتسيالاعانىن مالىمدەگەن.
ينتەرفاكس مالىمەتىنشە، پولشا، يتاليا جانە يسپانيا بيلىگى ءوز ازاماتتارىن «قولدا بار كەز كەلگەن تاسىلمەن» ەلدەن دەرەۋ كەتۋگە شاقىرعان. وسىنداي ۇندەۋدى اقش ازاماتتارىنا اقش پرەزيدەنتى دونالد ترامپ تا جاساعان ەدى.
بۇعان دەيىن اق ءۇي باسشىسى تەگەراننىڭ جاپپاي نارازىلىقتارعا قاتىسۋشىلارعا قاتىستى ارەكەتتەرىنە جاۋاپ رەتىندە يسلام رەسپۋبليكاسىنا قارسى اسكەري وپەراتسيا جۇرگىزۋ مۇمكىندىگىن جوققا شىعارماعان. كەشە كەشكە Reuters اگەنتتىگى اقش الداعى 24 ساعات ىشىندە يرانعا سوققى بەرۋى مۇمكىن ەكەنىن حابارلاعان بولاتىن.
Reuters جاريالانىمىنان كەيىن ترامپقا يراندا شەرۋشىلەردى ءولتىرۋ توقتاتىلعانى تۋرالى ايتىلدى. بۇل مۇمكىن بولاتىن اسكەري ارەكەتتەردەن باس تارتۋدى بىلدىرە مە دەگەن سۇراققا ترامپ ۆاشينگتون جاعدايدىڭ دامۋىن باقىلاۋدى جالعاستىراتىنىن مالىمدەگەن بولاتىن.
