اقش اكىمشىلىگى 15 قاڭتارعا اۋعان تۇننەن باستاپ الداعى 24 ساعات ىشىندە يرانعا اسكەري سوققى بەرۋى مۇمكىن. بۇل تۋرالى Reuters اگەنتتىگىنە جوعارى لاۋازىمدى ەۋروپالىق شەنەۋنىك ايتقان، دەپ حابارلايدى «ادىرنا» ءتىلشىسى.
اگەنتتىكتىڭ باسقا ءبىر دەرەككوزى امەريكالىق ارالاسۋدىڭ مۇمكىن ەكەنىن اتاپ كورسەتكەن. ال يزرايل شەنەۋنىگى پرەزيدەنت دونالد ترامپ سوققىلارعا قاتىستى شەشىم قابىلداعانىن، بىراق ولاردىڭ ناقتى كولەمى مەن ۋاقىتتارى ءالى ناقتىلاناتىنىن مالىمدەدى.
جاقىندا اق ءۇي باسشىسى يران حالقىن نارازىلىقتاردى جالعاستىرۋعا شاقىرىپ، ولارعا «كومەك جاقىن ارادا كەلەدى» دەپ ۋادە بەرگەن ەدى.
يرانداعى اۋقىمدى نارازىلىقتار 28 جەلتوقساننان بەرى جالعاسىپ كەلەدى. باستاپقىدا تەگەرانداعى دەمونسترانتتاردىڭ تالاپتارى ەكونوميكالىق تۇراقتىلىقتى قامتاماسىز ەتۋگە قاتىستى بولسا، كەيىن وعان ساياسي تالاپتار قوسىلدى.
ەڭ ءىرى نارازىلىقتارتەگەران قالاسىندا وتكەن، ال ەڭ قاتاڭ قاقتىعىستار ەلدىڭ باتىسى مەن وڭتۇستىك-باتىسىندا – مالەكشاح، كەرمانشاح جانە لوردەگان قالالارىندا تىركەلگەن. اقش-تا ورنالاسقان HRANA ادام قۇقىقتارى ۇيىمىنىڭ مالىمەتى بويىنشا، دۇيسەنبى كۇنى 10 مىڭ 700-دەن استام تۇتقىنداۋ فاكتىسى تىركەلگەن، بىراق بۇل ساندار رەسمي تۇردە راستالعان جوق.
وسىعان بايلانىستى يراننىڭ وپپوزيتسيالىق Iran International ۆەب-سايتى ناقتى قازا تاپقاندار سانى 12 مىڭعا جەتۋى مۇمكىن ەكەنىن مالىمدەدى. ودان الدىن Reuters يراننىڭ رەسمي وكىلدەرىنە سىلتەپ، نارازىلىقتان شامامەن ەكى مىڭ ادام قازا تاپقانىن حابارلاعان. بيلىك نارازىلىققا شىققانداردى "تەرروريستەر" دەپ اتاعان سوڭ، باسىپ-جانشۋ وپەراتسياسى باستالعان. ەلدە 9 قاڭتاردان بەرى ينتەرنەت تولىقتاي ءوشىرىلدى، تەلەفون بايلانىسى توقتاتىلعان. مەملەكەتتىك اقپارات قۇرالدارى رەسمي تۇلعالارعا سىلتەپ نارازىلىق بارىسىندا قازا تاپقانداردىڭ كىناسىن "تەرروريستەرگە" اۋدارىپ وتىر. نارازىلىققا شىققانداردى يران باسشىلارى "تەرروريستەر", "بۇزاقىلار" جانە "ەكسترەميستەر" دەپ اتاپ وتىر.
بۇگىن «ادىرنا» ۇلتتىق پورتالى دا ءوزىنىڭ كەزەكتى ۆيدەو-سۇقباتىندا يرانداعى تولقۋلاردىڭ شىعۋ سەبەبى مەن سالدارىن تالقىلاعان. وندا اقش-تىڭ يرانعا قاتىستى شاراسى اق ۇيدە قارالىپ، بۇگىن شەشىم قابىلدانۋى مۇمكىن ەكەندىگى ايتىلعان.
