قىرعىزستان پرەزيدەنتىنىڭ ءباسپاسوز حاتشىسى اسحات الاگوزوۆ رەسەيدىڭ پروپاگانداشىل ءجۋرناليسى ۆلاديمير سولوۆەۆتىڭ سوڭعى مالىمدەمەلەرىنە نە سەبەپتى رەسمي جاۋاپ بەرىلمەگەنىن ءتۇسىندىردى، دەپ حابارلايدى «ادىرنا» ءتىلشىسى fergana.ru-عا سىلتەمە جاساپ.
10 قاڭتاردا جۋرناليست ارمەنيا مەن ورتالىق ازيانى رەسەيدىڭ ىقپال ايماقتارى دەپ اتاپ، ولاردان «ايىرىلۋ» ۇلتتىق قاۋىپسىزدىك ءۇشىن تۇيتكىل بولاتىنىن جەتكىزگەن ەدى.
«مۇنداي مالىمدەمەلەردى رەسەيلىك ءجۋرناليستىڭ ءارتۇرلى تاقىرىپتاعى كوپ ساعاتتىق ەفيرلەرىنىڭ بىرىندە ايتىلعان بوس ءارى ماڭىزدى ەمەس ءسوز رەتىندە قابىلداۋ كەرەك. ەگەر پىكىر دەپۋتات نەمەسە مينيستر تاراپىنان ايتىلسا، بۇل – باسقا جاعداي. ول كەزدە جاۋاپ ءبىزدىڭ دەپۋتاتتار نەمەسە ۇكىمەت مۇشەلەرى ارقىلى بەرىلەتىن ەدى»،-دەدى الاگوزوۆ.
بۇعان دەيىن پارلامەنت دەپۋتاتى داستان بەكەشەۆ سولوۆەۆتى نون گراتا تۇلعا دەپ جاريالاۋدى ۇسىنعان ەدى. ءباسپاسوز حاتشىسىنىڭ ايتۋىنشا، بۇل ماسەلە قارالۋى مۇمكىن.
رەسەي مەن ءبىزدىڭ ەلىمىز اراسىنداعى ەكىجاقتى جانە كوپجاقتى قارىم-قاتىناستار، سونداي-اق رەسەي مەن ورتالىق ازيا مەملەكەتتەرى اراسىنداعى بايلانىس ەڭ جوعارعى دەڭگەيدە قالىپتاسقان. بۇل ءارتۇرلى دەڭگەيدەگى ءوزارا ساپارلار مەن تمد، ەاەو جانە شىۇ سياقتى ۇيىمدار اياسىنداعى ىنتىماقتاستىق ارقىلى كورىنىس تابادى. سوندىقتان بۇنداي بولجامداردىڭ نەگىزى جوق دەپ سانايمىن»،- دەپ تولىقتىردى ول.
الاگوزوۆ سولوۆەۆتىڭ مەملەكەتتىك ارنادا جۇمىس ىستەيتىنىن جانە ۇلتتار اراسىنداعى قارىم-قاتىناستى شيەلەنىستىرەتىن تۇسىنىكسىز مالىمدەمەلەرى ەكى ەل ازاماتتارى اراسىندا كەم دەگەندە تۇسىنبەۋشىلىك تۋعىزاتىنىن، كەي جاعدايلاردا قاتاڭ شارالار قولدانۋدى تالاپ ەتەتىنىن اتاپ ءوتتى.
ء«بىز ونىڭ باسشىلىعى اقىلعا قونىمدى شارالار قولدانادى دەپ ۇمىتتەنەمىز»،- دەپ قورىتىندىلادى قىرعىزستان پرەزيدەنتىنىڭ ءباسپاسوز حاتشىسى.
ورتالىق ازيانىڭ باسقا ەلدەرى ازىرگە رەسمي مالىمدەمە جاساعان جوق.
ەسكە سالايىق، 12 قاڭتاردا ارمەنيا ءسىم رەسەي ەلشىسى سەرگەي كوپىركيندى شاقىرىپ، رەسەيلىك مەملەكەتتىك تەلەارنا ەفيرىندە ايتىلعان مالىمدەمەلەرگە بايلانىستى نارازىلىق نوتاسىن تابىستاعان بولاتىن.
