الماتى ورتالىق ازياداعى ءومىر ءسۇرۋ قۇنى ەڭ جوعارى قالا اتاندى. جاڭا رەيتينگتە وڭتۇستىك مەگاپوليس استانانى، تاشكەنتتى جانە بىشكەكتى ارتتا قالدىردى، دەپ حابارلايدى «ادىرنا» ءتىلشىسى.
Numbeo ساراپشىلارى الەمنىڭ 479 قالاسىنداعى ءومىر ءسۇرۋ قۇنىن سالىستىرىپ، ارنايى رەيتينگ جاساعان. ەسەپتەۋ بارىسىندا تۇرعىن ۇيگە كەتەتىن شىعىندار (جالعا الۋ، يپوتەكا) ەسەپكە الىنباي، تۇتىنۋ تاۋارلارى مەن قىزمەتتەرىنىڭ باعاسى – ازىق-تۇلىك، مەيرامحانا، كولىك جانە كوممۋنالدىق قىزمەتتەر كورسەتكىشتەرى پايدالانىلعان.
ناتيجەسىندە شارتتى ءومىر ءسۇرۋ قۇنىنىڭ يندەكسى جاسالعان. ونىڭ باستاپقى ولشەمى رەتىندە اقش-تاعى نيۋ-يورك قالاسى الىنىپ، بارلىق كورسەتكىش بويىنشا 100 بالل بەرىلگەن. ياعني رەيتينگتەگى باسقا قالالار نيۋ-يوركپەن سالىستىرىلىپ، ودان ارزان نەمەسە قىمبات بولىپ بولىنگەن.
ساراپشىلاردىڭ مالىمەتىنشە، نيۋ-يوركتەن قىمبات تەك شۆەيتساريانىڭ التى قالاسى عانا بار. بۇل تىزىمدە كوشباسشى – تسيۋريح، ونىڭ يندەكسى 118,5 بالل، ياعني نيۋ-يوركتەن 18,5%-عا قىمبات.
رەيتينگكە الماتى مەن استانا دا ەنگەن. الماتى 401-ورىنعا، ال استانا 428-ورىنعا جايعاسقان.
الماتىداعى ءومىر ءسۇرۋ قۇنىنىڭ يندەكسى – 33 بالل، بۇل نيۋ-يوركپەن سالىستىرعاندا 67%-عا ارزان دەگەن ءسوز.
باسقا كورسەتكىشتەر بويىنشا:
• جالعا الۋ قۇنى – 15,7 بالل (84,3%-عا تومەن);
• ازىق-تۇلىك باعاسى – 31,9 بالل (68,1%-عا تومەن);
• مەيرامحانالارداعى باعالار – 35,5 بالل (64,5%-عا تومەن);
• ساتىپ الۋ قابىلەتى يندەكسى – 55,7 بالل (44,3%-عا تومەن).
استانادا ءومىر ءسۇرۋ قۇنىنىڭ يندەكسى – 29,7 بالل، جالعا الۋ – 12,1 بالل، ازىق-تۇلىك – 29,9 بالل، مەيرامحانالار – 31,6 بالل، ال تۇرعىنداردىڭ ساتىپ الۋ قابىلەتى – 62,5 بالل.
ورتالىق ازيانىڭ باسقا قالالارىنان تىزىمگە تاشكەنت (431-ورىن) پەن بىشكەك (435-ورىن) ەندى.
الەمدەگى ەڭ ارزان قالالار ءتىزىمىنىڭ العاشقى ۇشتىگى ءۇندىستاندا ورنالاسقان: يندور (18,4 بالل), لاكحناۋ (17,8 بالل) جانە كويمباتۋر (17,6 بالل).
سۋرەت: gov.kz
