وڭتۇستىك كورەيا پروكۋراتۋراسى ەلدىڭ بۇرىنعى پرەزيدەنتى يۋن سوك يولگە ءولىم جازاسىن سۇرادى، دەپ حابارلايدى «ادىرنا» ءتىلشىسى dw.com-عا سىلتەمە جاساپ.
«بۇرىنعى پرەزيدەنت يۋن سوت جانە زاڭ شىعارۋشى بيلىكتى باسىپ الىپ، بيلىكتە ۇزاق قالۋ ماقساتىندا اسكەري جاعداي ەنگىزدى. قىلمىستىڭ سيپاتى وتە اۋىر، ويتكەنى ول ۇلتتىق قوعام مۇددەسىنە عانا پايدالانىلۋى ءتيىس ماتەريالدىق رەسۋرستاردى جۇمىلدىردى»،- دەدى ارنايى پروكۋروردىڭ كومەكشىسى سەۋلدىڭ ورتالىق اۋداندىق سوتىنداعى سوڭعى وتىرىستا.
Yonhap مالىمەتىنشە، ۇكىم سۇرالعان ساتتە ەكس-پرەزيدەنت سوت زالىندا ءۇنسىز جىميىپ وتىرعان، ال ونىڭ كەيبىر جاقتاستارى بالاعات سوزدەر ايتقان. تىڭداۋ شامامەن 11 ساعاتقا سوزىلعان. سوت 19 اقپاندا ۇكىم شىعارۋدى جوسپارلاپ وتىر.
ەسكە سالا كەتەيىك، 2024 جىلدىڭ جەلتوقسانىندا كورەيانىڭ ەكس-پرەزيدەنتى يۋن سوك يول ەلدە اسكەري جاعداي ەنگىزىلگەنىن جاريالاعان ەدى. ول بۇل شەشىمىن «كونستيتۋتسيالىق ءتارتىپتى قورعاۋ» جانە «سولتۇستىك كورەيانىڭ كوممۋنيستىك كۇشتەرىنەن تونگەن قاۋىپتىڭ» الدىن الۋ قاجەتتىلىگىمەن تۇسىندىرگەن.
اسكەري جاعداي ەنگىزۋگە وپپوزيتسيالىق دەموكراتيالىق پارتيانىڭ جەتەكشىسى لي دجە مەن قارسى شىققان. ول پارتيا مۇشەلەرىن پارلامەنت عيماراتىنا جينالۋعا شاقىرعان. كەيىن رەسپۋبليكا پارلامەنتى اسكەري جاعدايدى جويۋ تۋرالى شەشىم قابىلدادى.
وسىدان سوڭ وپپوزيتسيالىق پارتيا پرەزيدەنتتى وتستاۆكاعا كەتۋگە شاقىرىپ، وڭتۇستىك كورەيا پوليتسياسى يۋن سوك يولگە قاتىستى مەملەكەتتىك توڭكەرىس ۇيىمداستىرۋ فاكتىسى بويىنشا تەرگەۋ باستادى.
