قوستاناي قالاسىنداعى №2 سوت جەرگىلىكتى تۇرعىن يۋليا حوندى TikTok الەۋمەتتىك جەلىسىندە قازاقتاردى قورلاعانى ۇشىن ەكى جىلعا باس بوستاندىعىنان ايىردى، دەپ حابارلايدى "ادىرنا" ۇلتتىق پورتالى Tobolinfo-عا سىلتەپ.
سوت ۇكىمىمەن قازاقستان ازاماتى قىلمىستىق كودەكستىڭ 174-بابىنىڭ 1-بولىگى («الەۋمەتتىك، ۇلتتىق، رۋلىق، ناسىلدىك، تاپتىق نەمەسە ءدىني ارازدىقتى قوزدىرۋ») بويىنشا كىنالى دەپ تانىلدى. ول جازاسىن ەڭ تومەن قاۋىپسىزدىك دەڭگەيىندەگى كولونيادا وتەيدى.
سوتتا انىقتالعانداي، 2024 جىلدىڭ قاراشا ايىنىڭ باسىندا، شامامەن 03:45-تە، ايەل ماس كۇيىندە TikTok جەلىسىنە كىرىپ، ءوز اككاۋنتىنان تىكەلەي ەفيرگە شىققان. رەسەي مەن ۋكراينا اراسىنداعى قارۋلى قاقتىعىس تاقىرىبى تالقىلانعان ەفير بارىسىندا ول اڭگىمەلەسۋشىلەرگە ۇلتتىق بەلگىسى بويىنشا بەيادەپ ءارى قورلايتىن سوزدەر ايتقان. سوت بۇل ارەكەتتەردى ۇلتتىق ارازدىقتى قوزدىرۋعا باعىتتالعان دەپ باعالادى.
سۋديا ولگا كۋزنەتسوۆا ايىپتالۋشىنىڭ كىناسى تىكەلەي ەفيردىڭ جازباسىمەن، ساراپتامالىق قورىتىندىلارمەن جانە كۋاگەرلەردىڭ كورسەتۋلەرىمەن دالەلدەنگەنىن ايتتى. ۇكىم جاريالانعاننان كەيىن يۋليا حون سوت زالىندا قاماۋعا الىندى. سونداي-اق ول 826 مىڭ تەڭگە كولەمىندە پروتسەسسۋالدىق شىعىنداردى وتەۋى ءتيىس.
ىستە جازانى جەڭىلدەتەتىن ءمان-جايلار رەتىندە ايىپتالۋشىنىڭ جول-كولىك وقيعاسىنان كەيىن كورۋ قابىلەتىنەن ايىرىلعان ۇلىنىڭ بار ەكەنى جانە ونى ەمدەتۋگە قاراجات جۇمساپ جۇرگەنى، سونداي-اق بۇرىن سوتتالماعانى ەسكەرىلگەن.
ايىپتالۋشىنىڭ ادۆوكاتى ۆالەري لي سوت وتىرىسىندا تىكەلەي ەفير كەزىندە ونىڭ قورعاۋىنداعى ايەلدىڭ دە قورلانعانىن، ءارى ول بۇكىل ۇلتتى ەمەس، ناقتى ءبىر ادامدى تىلدەگەنىن العا تارتتى. قورعاۋ تاراپى سوت شەشىمىنە شاعىم تۇسىرەتىنىن مالىمدەدى.
