مەملەكەت باسشىسى قاسىم-جومارت توقاەۆ كونستيتۋتسيالىق رەفورماعا قاتىستى ءتۇسىپ جاتقان ۇسىنىستارمەن تانىستى. بۇل تۋرالى اقوردا جازدى، دەپ حابارلايدى “ادىرنا”.
قاسىم-جومارت توقاەۆ مەملەكەتتىك كەڭەسشى ەرلان قارينمەن جانە پرەزيدەنتتىڭ قۇقىقتىق ماسەلەلەر جونىندەگى كومەكشىسى ەرجان جيەنباەۆپەن پارلامەنتتىك رەفورما بويىنشا كەزەكتى جۇمىس كەڭەسىن وتكىزدى.
ەرلان قارين مەملەكەت باسشىسىنا جۇمىس توبىنىڭ 9 قاڭتاردا وتكەن وتىرىسىندا بولاشاق ءبىر پالاتالى پارلامەنتتىڭ مارتەبەسىن، وكىلەتتىكتەرى مەن فۋنكتسيالارىن انىقتاۋعا، سونداي-اق بيلىكتىڭ باسقا دا تارماقتارىمەن ءوزارا ءىس-قيمىلىنا قاتىستى تاسىلدەر ازىرلەنگەنىن ايتتى.
15 قاڭتارعا جوسپارلانعان كەلەسى وتىرىستا جاڭا پارلامەنتتىڭ باستى مەملەكەتتىك ينستيتۋتتاردىڭ قىزمەتىن قامتاماسىز ەتۋ وكىلەتتىكتەرى تالقىلانادى. ەرجان جيەنباەۆ مەملەكەت باسشىسىن كونستيتۋتسيالىق رەفورماعا قاتىستى جۇمىس توبى مۇشەلەرى مەن جۇرتشىلىقتان كەلىپ تۇسكەن جاڭا ۇسىنىستارمەن تانىستىردى. پرەزيدەنت بارلىق پىكىر مەن باستامانى ەسكەرۋ قاجەت ەكەنىن اتاپ ءوتتى.
سونداي-اق كونستيتۋتسيالىق رەفورما بويىنشا تۇپكىلىكتى شەشىمدى ەل ازاماتتارى جالپىۇلتتىق رەفەرەندۋمدا قابىلدايتىنىن مالىمدەدى. سونىمەن قاتار كەزدەسۋدە ۇلتتىق قۇرىلتايدىڭ قىزىلوردا قالاسىندا وتەتىن بەسىنشى وتىرىسىنا دايىندىق ماسەلەسى قارالدى.
مەملەكەت باسشىسى قۇرىلتاي وتىرىسىن وتكىزۋدى وسى جىلدىڭ 20 قاڭتارىنا بەلگىلەپ، الداعى ماڭىزدى ءىس-شارانى ۇيىمداستىرۋ جانە وعان تىڭعىلىقتى ازىرلەنۋ جونىندە ناقتى تاپسىرما بەردى.
