شىمكەنت قالاسىنداعى 6506 اسكەري بولىمىندە بورىشىن وتەپ جاتقان مەرزىمدى اسكەري قىزمەتشىنىڭ قايتىس بولۋىنا بايلانىستى ۇلتتىق ۇلاننىڭ ءباسپاسوز قىزمەتى رەسمي تۇسىنىكتەمە بەردى، دەپ حابارلايدى "ادىرنا" ۇلتتىق پورتالى.
ۆەدومستۆو حابارلاۋىنشا، اسكەري قىزمەتشى بولىمگە 2025 جىلدىڭ 9 جەلتوقسانىندا كەلگەن. العاش رەت 17 جەلتوقساندا مەديتسينالىق كومەككە جۇگىنگەن، سودان كەيىن وعان قاجەتتى تەكسەرۋلەر مەن تالداۋلار جۇرگىزىلىپ، مەديتسينالىق مامانداردىڭ تۇراقتى باقىلاۋىندا بولعان.
29 جەلتوقساندا دەنساۋلىعىنىڭ كۇرت ناشارلاۋىنا بايلانىستى ونى اۋرۋحاناعا جەتكىزۋ قاجەتتىلىگى تۋىنداعان. دەگەنمەن، سارباز 2026 جىلعى 6 قاڭتاردا جۇرەك قىزمەتىنىڭ توقتاۋىنان قايتىس بولدى. الدىن الا دياگنوز – جەدەل لەيكوز.
بۇل وقيعا ەرەكشە باقىلاۋعا الىنعانى اتاپ ءوتىلدى. وسى دەرەك بويىنشا اسكەري-تەرگەۋ دەپارتامەنتى قىلمىستىق ءىس قوزعادى، ال تەرگەۋ بارىسى اسكەري پروكۋراتۋرانىڭ باقىلاۋىندا جۇرگىزىلىپ جاتىر.
