قازاقستان رەسپۋبليكاسى پارلامەنتى ءماجىلىسىنىڭ دەپۋتاتى يماشەۆا سنەجاننا ۆالەرەۆنا باتىس قازاقستان وبلىسىنا ءىس-ساپارى بارىسىندا «Batys hub» يننوۆاتسيالىق ورتالىعى جۇمىسىمەن تانىستى. Batys Hub — باتىس قازاقستانداعى تسيفرلىق داعدىلاردى دامىتۋعا، ستارتاپتاردى قولداۋعا جانە مىقتى IT-قوعامداستىق قۇرۋعا ارنالعان ايماقتىق الاڭ. حاب جاڭا جوبالاردىڭ پايدا بولۋىنا جانە تەحنولوگيالىق كاسىپكەرلىكتىڭ وسۋىنە قولايلى ورتا قالىپتاستىرادى.
Batys Hub-تىڭ ميسسياسى — وقۋعا، ستارتاپتاردى ىسكە قوسۋعا، پىكىرلەس ادامداردى تابۋعا جانە ايماقتىق تەحنولوگيالىق قوزعالىستىڭ ءبىر بولىگى بولۋعا مۇمكىندىك بەرەتىن IT-ەكوجۇيەنى قۇرۋ.
Batys Hub ءوز جۇمىسىن 2023 جىلدىڭ ناۋرىز ايىندا Jaiq Hub اتاۋىمەن باستادى. 2025 جىلدىڭ 6 قازانىندا حاب مارتەبەسى رەسمي تۇردە بەكىتىلىپ، Batys Hub دەپ اتالىپ، رەبرەندينگ جۇرگىزىلدى. بۇل كەزەڭ ايماقتىق برەندتى نىعايتىپ، ميسسيانى كۇشەيتكەن جاڭا دامۋ ساتىسىن بىلدىرەدى.
«دەپۋتاتتاردىڭ وڭىرلەرگە ساپارداعى ەڭ باستى ماقساتى – ماجىلىستە اتقارىلعان جۇمىستاردى تالقىلاۋ. ونىڭ ىشىندە سايلاۋشىلارمەن كەرى بايلانىس جۇرگىزۋ نەگىزگى قىزمەتىمىز. وڭىردەگى ساپارىم ءبورلى اۋدانى مەن تەرەكتى اۋدانىنان باستاۋ الدى. تۇرعىنداردىڭ كەزدەسۋلەردە قوياتىن نەگىزگى سۇراقتارى الەۋمەتتىك-ەكونوميكالىق احۋالعا بايلانىستى. بۇگىنگى ءبىز تانىسىپ تۇرعان نىسان – Batys hub ورتالىعى قازىرگى تسيفرلاندىرۋ داۋىرىندەگى اسا ماڭىزدى نىسانداردىڭ ءبىرى. سەبەبى مەملەكەت باسشىسى دا اتاپ وتكەندەي، بيىلعى جىل تسيفرلاندىرۋ جانە جاساندى ينتەللەكت جىلى دەپ جاريالانعان بولاتىن. قازىرگى تاڭدا اسا قارقىن الىپ كەلە جاتىرعان ونلاين تولەمدەر، تسيفرلىق قىزمەتتەر كۇندەلىكتى ومىرىمىزگە ەندى. ال بۇل ورتالىقتار باسقا دا باعىتتاردى، دەنساۋلىق ساقتاۋ، ءبىلىم سالاسى سياقتى باعىتتارداعى ءارتۇرلى ماسەلەلەردى جەڭىلدەتۋگە ۇلكەن مۇمكىندىك بەرەدى», - دەدى قازاقستان رەسپۋبليكاسى پارلامەنتى ءماجىلىسىنىڭ دەپۋتاتى سنەجاننا يماشەۆا.
ورتالىقتا قازىرگى تاڭدا 20-عا جۋىق ماماندار شوعىرلانعان. ولاردىڭ بىرقاتار جوبالارى الەمدىك دودالاردا ۇزدىكتەر قاتارىنان كورىندى. اۋىل شارۋاشىلىعى، قۇرىلىس سالاسى، بالالار دەنساۋلىعى تاقىرىپتارىندا بىرقاتار سالا ماماندارى ءوز جوبالارىنىڭ تانىستىرىلىمىن جۇرگىزدى. سونىمەن قاتار جوبا اۆتورلارى قازىرگى تاڭدا قوعامعا تيگىزەتىن پايداسى، قاراجات تابۋ مۇمكىندىكتەرى تاقىرىپتارىنا توقتالىپ ءوتتى.
