اباي اتىنداعى وبلىستىق امبەباپ كىتاپحاناسىندا كورنەكتى جازۋشى، دراماتۋرگ، پۋبليتسيست مەدەۋ سارسەكەنىڭ تۋعانىنا 90 جىل تولۋىنا وراي «ەسىمى ەلىنە ءماشھۇر قالامگەر» اتتى ەسكە الۋ كەشى ءوتتى.
تاعىلىمدى شاراعا قالامگەردىڭ تۋىستارى، زيالى قاۋىم وكىلدەرى، ادەبيەتتانۋشى عالىمدار، ونەر ادامدارى، جاستار مەن قالاداعى كوللەدج كىتاپحاناشىلارى قاتىستى. كەشتىڭ نەگىزگى ماقساتى – مەدەۋ سارسەكەنىڭ قازاق ادەبيەتى مەن ۇلتتىق رۋحانياتقا قوسقان ولشەۋسىز ۇلەسىن كەڭىنەن ناسيحاتتاۋ، شىعارماشىلىق مۇراسىن كەيىنگى ۇرپاققا تانىتۋ بولدى.
كەشتە قازاقستان جۋرناليستەر وداعىنىڭ مۇشەسى، قر مادەنيەت سالاسىنىڭ ۇزدىگى، اباي وبلىستىق ارداگەرلەر كەڭەسىنىڭ توراعاسى مۇرات سەيسەنۇلىنا سوز الىپ، مەدەۋ سارسەكەنىڭ ازاماتتىق تۇلعاسى مەن قوعامدىق قىزمەتىنە توقتالدى.
شارا بارىسىندا فيلولوگيا عىلىمدارىنىڭ دوكتورى، پروفەسسور باۋىرجان ءومىرجانۇلى جاقىپتىڭ قالامگەرگە ارنالعان ارناۋ ءسوزى بەينەماتەريال ارقىلى ۇسىنىلدى. سونداي-اق ادەبيەتتانۋشى، فيلولوگيا عىلىمدارىنىڭ دوكتورى، شاكارىم اتىنداعى ۋنيۆەرسيتەتتىڭ پروفەسسورى، قازاقستاننىڭ ەڭبەك سىڭىرگەن قايراتكەرى، «پاراسات» وردەنىنىڭ يەگەرى، اباي وبلىسىنىڭ قۇرمەتتى ازاماتى اراپ ءسلامۇلى ەسپەنبەتوۆ جازۋشىنىڭ ادەبي مۇراسىنا تەرەڭ تالداۋ جاساپ، عىلىمي تۇرعىدان باعا بەردى.
كەشتىڭ مازمۇنىن بايىتا تۇسكەن بولىمدەردىڭ ءبىرى – مەدەۋ سارسەكەنىڭ دراماتۋرگياسىنا ارنالدى. بۇل رەتتە قالامگەردىڭ ساحنالىق شىعارمالارى تۋرالى اقپارات بەرىلىپ، تەاتر قايراتكەرى، رەجيسسەر، پروفەسسور ەسمۇقان وباەۆتىڭ ارنايى بەينەبايانى كورەرمەن نازارىنا ۇسىنىلدى.
شارا بارىسىندا اقىن ءارى مادەنيەتتانۋشى نۇرقاسىم قۇسميليا جىرعالىۇلى قالامگەر تۇلعاسى جايىندا وي تولعاسا، شاكارىم جوعارى كوللەدجىنىڭ وقىتۋشىسى، گۋمانيتارلىق عىلىمدار ماگيسترى ساۋلە قايساقىزى «مەدەۋ شىعارماشىلىعىنداعى ۇلتتىق قۇندىلىق پەن زيالىلىق» تاقىرىبىندا مازمۇندى بايانداما جاسادى.
قالامگەردىڭ 2025 جىلى «اباي جولى» كىتاپحاناسى جوباسى اياسىندا جارىققا شىققان كىتابىنىڭ تانىستىرىلىمى دا نازاردان تىس قالمادى.
شارادا جازۋشى جايىندا ەستەلىكتەر ايتىلىپ، «قالام قۇدىرەتى» تاقىرىبىندا جازۋشى شىعارماشىلىعىنا نەگىزدەلگەن كەڭ كولەمدى كىتاپ كورمەسى جاساقتالدى. كورمەگە جازۋشىنىڭ ءار جىلداردا جارىققا شىققان ەڭبەكتەرى، مەرزىمدى باسىلىم بەتتەرىندە جارىق كورگەن ماقالالارى قويىلدى.
ەسكە الۋ كەشى قالامگەر رۋحىنا كورسەتىلگەن تاعزىم رەتىندە جوعارى دەڭگەيدە ءوتىپ، قاتىسۋشىلارعا تەرەڭ اسەر قالدىردى.
ريما قاناپياقىزى،
اباي اتىنداعى وبلىستىق امبەباپ كىتاپحاناسى
