بەلگىلى مەملەكەت جانە قوعام قايراتكەرى مۇستافا شوقايدىڭ 135 جىلدىعىنا وراي ۇلتتىق مۋزەيدە «ماريا شوقاي: ماحاببات پەن ادالدىق تاريحى» اتتى كورمە ءوتىپ جاتىر، دەپ حابارلايدى «ادىرنا» ءتىلشىسى.
ەكسپوزيتسيادا ماريا شوقاي ۇزاق جىلدار بويى كوزىنىڭ قاراشىعىنداي ساقتاعان 50-دەن استام تۇپنۇسقا فوتوسۋرەت ۇسىنىلعان. بۇل فوتوسۋرەتتەر ارقىلى ەرلى-زايىپتىلاردىڭ ءومىر جولىن، رۋحاني بايلانىسىن، قيلى تاعدىرىن ايقىن كورۋگە بولادى.
«اتالعان كورمە – حح عاسىردىڭ كۇردەلى تاريحي كەزەڭىندە ەميگراتسيادا وتكەن مۇستافا شوقايدىڭ تاعدىرلى عۇمىرىن ونىڭ ادال جارى ءارى سەنىمدى سەرىگى ماريا شوقايدىڭ كوزىمەن تانىتاتىن ەرەكشە جوبا»،-دەلىنگەن حابارلامادا.
سونىمەن قاتار ەكسپوزيتسيادا ولاردىڭ ورتاق دوستارى جانە زامانداستارىنا قاتىستى تىڭ دەرەكتەر قامتىلعان. قويىلعان فوتوسۋرەتتەردىڭ ءبىر بولىگى ۇلتتىق مۋزەي قورىنا سىيعا بەرىلەدى.
ايتا كەتەيىك، 31 جەلتوقسان كۇنى وتكەن كورمەنىڭ اشىلۋ سالتاناتىندا مۇستافا شوقايدىڭ تۋىسى گۇلبارشىن زايروۆا بۇعان دەيىن كوپشىلىك نازارىنا ۇسىنىلماعان وتباسىلىق فوتوسۋرەتتەردى مۋزەي قورىنا تابىستاعان بولاتىن.
كورمە 31 قاڭتارعا دەيىن وتەدى.
