اسا ءىرى مولشەردە بىرنەشە رەت الاياقتىق جاسادى دەگەن كۇدىككە ىلىنگەن قازاقستاندىق رەسەيدەن ەكستراديتسيالاندى. بۇل تۋرالى باس پروكۋراتۋرا جازدى، دەپ حابارلايدى «ادىرنا» ءتىلشىسى.
«كۇدىكتى 2024-2025 جىلدار ارالىعىندا تاراز قالاسىندا ءوزىن كوممەرتسيالىق ۇيىمنىڭ قىزمەتكەرىمىن دەپ تانىستىرىپ، قاراجاتتى ينۆەستيتسيالاۋ ارقىلى جوعارى تابىسقا ۋادە بەرىپ، ازاماتتاردى ءارتۇرلى تاۋارلاردى كوتەرمە ساتىپ الۋ جانە كەيىننەن ساتۋ بويىنشا بىرلەسكەن كاسىپپەن اينالىسۋعا شاقىرعان. الايدا ول ءوز مىندەتتەمەلەرىن ورىنداماي، العان اقشاسىن جىمقىرىپ، قاجەتتىلىگىنە جۇمساعان.
ونىڭ قىلمىستىق ارەكەتتەرى ناتيجەسىندە قازاقستاننىڭ 6 ازاماتىنا جالپى 100 ملن تەڭگەدەن استام زالال كەلتىرىلگەن»،-دەلىنگەن حابارلامادا.
قىلمىس جاساعاننان كەيىن ول جاسىرىنىپ، وعان حالىقارالىق ىزدەۋ جاريالانعان.
وتكەن جىلدىڭ تامىزىندا كۇدىكتى رەسەيدە ۇستالىپ، قازاقستان رەسپۋبليكاسى باس پروكۋراتۋراسىنىڭ سۇراۋى بويىنشا ەلگە ەكستراديتسيالانعان. قازىرگى ۋاقىتتا ول تەرگەۋ يزولياتورىنا قاماۋعا الىنعان.
ايىپتالعان قىلمىستى جاساعانى ءۇشىن مۇلكى تاركىلەنىپ، 5 جىلدان 10 جىلعا دەيىن باس بوستاندىعىنان ايىرۋ جازاسى قاراستىرىلعان.
