شەشەنستان باسشىسى رامزان قادىروۆتىڭ ۇلى ادام قادىروۆ شەشەن رەسپۋبليكاسىنىڭ تۇڭعىش پرەزيدەنتى احمات-حادجي قادىروۆتىڭ رۋحىنا ارنالعان مەدالمەن ماراپاتتالدى. بۇل تۋرالى ەلدىڭ ۇلتتىق ساياسات، سىرتقى بايلانىستار، ءباسپاسوز جانە اقپارات ءمينيسترى احمەد دۋداەۆ ايتتى، دەپ حابارلايدى «ادىرنا» ءتىلشىسى.
«شەشەن رەسپۋبليكاسىنىڭ باسشىسىنىڭ كومەكشىسى، قاۋىپسىزدىك كەڭەسىنىڭ حاتشىسى، قادىرلى باۋىرىم ادام قادىروۆتى «شەشەن رەسپۋبليكاسىنىڭ تۇڭعىش پرەزيدەنتى احمات-حادجي قادىروۆتىڭ رۋحىنا» ارنالعان مەدالمەن ماراپاتتالۋىمەن قۇتتىقتايمىن. بۇل مەدال — احمات-حادجي قادىروۆتىڭ تاريحي تۇلعاسىنا دەگەن تەرەڭ قۇرمەت پەن ءىلتيپاتتى بىلدىرەدى. ول – ءومىرىن شەشەن حالقىنىڭ مۇددەسىنە قىزمەت ەتۋگە ارناعان جان»، — دەلىنگەن دۋداەۆتىڭ جازباسىندا.
ونىڭ ايتۋىنشا، ماراپات ادام قادىروۆقا رەسپۋبليكانىڭ قاۋىپسىزدىگى، تۇراقتىلىعى مەن وركەندەۋىن قامتاماسىز ەتۋگە قوسقان ەلەۋلى ۇلەسى ءۇشىن بەرىلگەن.
«ونىڭ باسشىلىعىمەن شەشەن رەسپۋبليكاسىندا سەنىمدى دامۋ مەن ءال-اۋقاتقا جاعداي جاسالىپ جاتىر»،-دەدى دۋداەۆ.
ءساۋىر ايىنىڭ باسىندا ادام قادىروۆ رەسەي ءىىم-ءنىڭ شەشەنستانداعى باسقارماسىن قاداعالاۋشى كۋراتور بولىپ تاعايىندالدى. وسىدان كەيىن ول شەشەنستان ءىىم-ءنىڭ ىشكى قاۋىپسىزدىك ءبولىمىنىڭ جاڭا باسشىسىن تاڭداپ، ءوزى باتىر دەپ اتاعان بىرنەشە قىزمەتكەرگە مەدال تابىستادى. كەيىن شەشەنستان باسشىسى رامزان قادىروۆتىڭ ۇلى تاعى ءبىر جوعارى قىزمەتكە يە بولىپ، رەسپۋبليكانىڭ قاۋىپسىزدىك كەڭەسىنىڭ حاتشىسى اتاندى.
2023 جىلدىڭ قاراشاسىندا نەبارى 15 جاسىندا ادام قادىروۆ اكەسىنىڭ قاۋىپسىزدىك قىزمەتىنىڭ باسشىسى بولدى. كەيىن ول رەسەيدىڭ رەكوردتار كىتابىنا ايماق باسشىسىنىڭ قاۋىپسىزدىك قىزمەتىن باسقارعان ەڭ جاس باسشى رەتىندە ەندى.
18 جاسقا دەيىن ادام قادىروۆ شەشەنستاننىڭ ەڭ جوعارى ماراپاتىن — قادىروۆ وردەنىن، «شەشەنستاننىڭ باتىرى» مەدالىن، قاراشاي-شەركەسيا مەن كاباردين-بالقاريا الدىنداعى ەڭبەگى ءۇشىن وردەندەردى، تاتارستاننىڭ ماڭىزدىلىعى جاعىنان ەكىنشى ماراپاتى سانالاتىن «دۋسلىك» وردەنىن، «شەشەن رەسپۋبليكاسىنىڭ قورعاۋشىسى» مەدالىن جانە وزگە دە ماراپاتتاردى الىپ ۇلگەردى.
