استانادا جۇرگىزۋشىسىز تاكسي جوباسىن ىسكە قوسۋ تۋرالى مەموراندۋمعا قول قويىلدى. بۇل تۋرالى جاساندى ينتەللەكت جانە تسيفرلىق دامۋ مينيسترلىگى ايتتى، دەپ حابارلايدى «ادىرنا» ءتىلشىسى.
«جاساندى ينتەللەكت جانە تسيفرلىق دامۋ مينيسترلىگى، كولىك مينيسترلىگى، استانا قالاسىنىڭ اكىمدىگى جانە inDrive كومپانياسى 2026 جىلى استانادا جۇرگىزۋشىسىز تاكسي بويىنشا پيلوتتىق جوبانى ىسكە قوسۋ تۋرالى مەموراندۋمعا قول قويدى. ەلوردا 2026 جىلى inDrive كومپانياسى ۇسىنعان جۇرگىزۋشىسىز تاكسي جوباسى ىسكە قوسىلاتىن قازاقستانداعى العاشقى قالالاردىڭ قاتارىنا ەنەدى. شاھار قالالىق موبيلدىلىكتىڭ جاڭا فورماتىنا كوشۋگە دايىندالىپ، اۆتونومدى كولىكتى «قاۋىپسىزدىكتى ارتتىرۋ، جايلىلىق پەن قالالىق ورتانىڭ ساپاسىن جاقسارتۋ قۇرالى» رەتىندە قاراستىرىپ وتىر»،- دەلىنگەن حابارلامادا.
وزدىگىنەن جۇرەتىن اۆتوكولىكتەردى ەنگىزۋ جوباسى «اقىلدى قالا» ستراتەگياسى مەن تسيفرلىق ينفراقۇرىلىمدى دامىتۋ اياسىندا جۇزەگە اسىرىلماق. العاشقى كەزەڭى تەستىلەۋدەن وتكىزۋدى، زاڭنامالىق تۇرعىدا رەتتەۋدى جانە ينفراقۇرىلىمىن دايىنداۋدى قامتاماسىز ەتۋدى قاراستىرادى.
«جۇرگىزۋشىسىز تاكسي بويىنشا پيلوتتىق جوبانى ىسكە قوسۋ - اقىلدى ءارى قاۋىپسىز قالالىق موبيلدىلىكتى دامىتۋداعى ماڭىزدى قادام. اۆتونومدى كولىكتى ەنگىزۋ كەزەڭ-كەزەڭمەن، ازاماتتاردىڭ قاۋىپسىزدىگىن باسىمدىققا الا وتىرىپ ىسكە اسىرىلادى. سونداي-اق ينفراقۇرىلىمنىڭ دايىن بولۋىن قامتاماسىز ەتۋ ءبىز ءۇشىن ماڭىزدى. استانا - جاڭا تەحنولوگيا ەنگىزىلەر الدىندا ناقتى سىناقتان وتكىزىلەتىن الاڭعا اينالۋدا. مۇنداي ءتاسىل يننوۆاتسيالاردى قولداۋعا جانە قوعامنىڭ جاڭا تسيفرلىق شەشىمدەرگە دەگەن سەنىمىن قامتاماسىز ەتۋگە مۇمكىندىك بەرەدى», - دەدى پرەمەر-ءمينيستردىڭ ورىنباسارى - جاساندى ينتەللەكت جانە تسيفرلىق دامۋ ءمينيسترى جاسۇلان ماديەۆ.
