قازاقستاننىڭ ەكس-پرەزيدەنتى نۇرسۇلتان نازارباەۆ پەن رەسەي پرەزيدەنتى ۆلاديمير پۋتين كەزدەستى. ساياسي تۇلعالاردىڭ كەزەكتى باسقوسۋى ماسكەۋدەگى كرەمل سارايىندا ءوتتى، دەپ حابارلايدى “ادىرنا”.
رەسەي باسشىسىنىڭ ءباسپاسوز قىزمەتى جاريالاعان بەينەجازبادا قوس ساياساتكەردىڭ دوڭگەلەك ۇستەل باسىندا جايعاسقانى كورسەتىلگەن. رەسمي حابارلامادا كەزدەسۋدىڭ ناقتى كۇن ءتارتىبى مەن تالقىلانعان ماسەلەلەر تۋرالى كەڭىنەن اقپارات بەرىلمەگەن. حابارلامادا تەك جۇزدەسكەنى جايلى جازىلعان.
“مۇنداي داستارقان باسىنداعى كەزدەسۋ – ۇلكەن سەنىم مەن وتە جاقسى قارىم-قاتىناستىڭ بەلگىسى. بۇعان دەيىن مۇنداي قۇرمەتكە قحر توراعاسى سي تسزينپين مەن بەلارۋس پرەزيدەنتى الەكساندر لۋكاشەنكو يە بولعان”، – دەپ جازدى تاسس.
ايتا كەتەيىك، نۇرسۇلتان نازارباەۆ 2019 جىلى پرەزيدەنتتىكتەن كەتكەن سوڭ جىل سايىن ءبىر-ەكى مارتە ۆلاديمير پۋتينگە تۇراقتى تۇردە بارىپ تۇرادى. ولاردىڭ سوڭعى كەزدەسۋى 2025 جىلعى 29 مامىردا وتكەن.
