القابيلەر سوتى اتباسار تۇرمەسىندەگى ازاپتاۋ ىسىنە قاتىسى بار دەپ ايىپتالعان قىزمەتكەرلەردى اقتادى، دەپ حابارلايدى «ادىرنا» ءتىلشىسى.
24 جەلتوقساندا اقمولا وبلىسىنىڭ مامانداندىرىلعان اۋدانارالىق قىلمىستىق ىستەر جونىندەگى سوتىندا القابيلەردىڭ قاتىسۋىمەن قىلمىستىق-اتقارۋ جۇيەسى كوميتەتىنىڭ 12 قىزمەتكەرىنە قاتىستى قىلمىستىق ءىس قارالدى.
قىلمىستىق قۋدالاۋ ورگانى قاجك قىزمەتكەرلەرىن اتباسار قالاسىنداعى مەكەمەدە جازاسىن وتەپ جاتقان سوتتالعاندارعا تىيىم سالىنعان ىقپال ەتۋ ادىستەرىن قولداندى دەپ ايىپتاعان ەدى.
القابيلەر ءىستى قاراۋ قورىتىندىسى بويىنشا سوتتالۋشىلاردىڭ كىناسىزدىگى تۋرالى شەشىم شىعاردى. قىلمىس وقيعاسىنىڭ بولماۋى جانە سوتتالۋشىلاردىڭ كىناسىزدىگى تۋرالى شەشىم كەڭەسۋ بولمەسىندە داۋىس بەرۋ ارقىلى قابىلداندى.
«داۋىس بەرۋگە 10 القابي جانە 1 سۋديا قاتىسىپ، ارقايسىسى ءبىر داۋىستان يە. داۋىس بەرۋ كەزىندە ارتىقشىلىق قاراستىرىلماعان. سوت ۇكىمىمەن قاجك-نىڭ 12 قىزمەتكەرى كىناسىز دەپ تانىلدى. اقتالعاندارعا وڭالتۋ قۇقىعى تانىلدى»،-دەلىنگەن حابارلامادا.
ايتا كەتەيىك، 2023 جىلدىڭ قىركۇيەگىندە جەلىدە تۇرمە قىزمەتكەرلەرىنىڭ دارەتحانانى جۋدان باس تارتقانى ءۇشىن سوتتالعاندارعا كۇش قولدانعان ۆيدەوسى پايدا بولعان ەدى. بۇل وقيعاعا بايلانىستى تۇرمەنىڭ 12 قىزمەتكەرىنە ايىپ تاعىلىپ، سوت پروتسەسى 2024 جىلعى شىلدەدە باستالعان. ايىپتالۋشىلار سوتتا كولونيانىڭ ىشكى ءتارتىبىن ساقتاعاندارىن، قارسىلىق تانىتقان سوتتالعاندارعا قاتىستى ارنايى قۇرالداردى قولدانۋعا ءماجبۇر بولعانىن ايتىپ، ءوز ارەكەتتەرىنىڭ زاڭ اياسىندا جۇزەگە اسقانىن مالىمدەگەن جانە وزدەرىن تولىق اقتاۋدى سۇراعان.
ال بيىل اقپان ايىندا ءبىرىنشى ساتىداعى سوت تۇرمە قىزمەتكەرلەرىن كىناسىز دەپ تانىدى. بۇل شەشىم قۇقىق قورعاۋشىلار مەن ازاماتتىق بەلسەندىلەردىڭ نارازىلىعىن تۋدىرعان بولاتىن.
