2026 جىلعى 1 قاڭتاردان باستاپ نيدەرلاندىدا جول قوزعالىسى ەرەجەلەرىن بۇزعانى ءۇشىن سالىناتىن ايىپپۇلدار ورتا ەسەپپەن 4%-عا وسەدى. بۇل تۋرالى نەمىستىڭ BILD باسىلىمى جازدى، دەپ حابارلايدى "ادىرنا".
ەڭ كوپ قىمباتتاعان ايىپپۇلداردىڭ ءبىرى — كولىك جۇرگىزىپ وتىرىپ، ارنايى hands-free قۇرىلعىسىنسىز تەلەفون قولدانۋ. جاڭا ەرەجەگە سايكەس، مۇنداي زاڭ بۇزۋشىلىق ءۇشىن جۇرگىزۋشىلەر 440 ەۋرو ايىپپۇل تولەۋگە مىندەتتى بولادى.
جىلدامدىقتى ازداپ ارتتىرۋدىڭ ءوزى دە ەداۋىر شىعىنعا اكەلۋى مۇمكىن. ماسەلەن، ەلدى مەكەن ىشىندە رۇقسات ەتىلگەن جىلدامدىقتان 5 كم/ساع-قا اسىرۋ 46 ەۋروعا باعالانادى. ال اۆتوباندا جىلدامدىقتى 20 كم/ساع-قا ارتتىرعانى ءۇشىن 229 ەۋرو ايىپپۇل سالىنادى. قىزىل باعدارشامعا ءوتىپ كەتۋ كەمىندە 320 ەۋرو تۇرادى.
تۇراققا قاتىستى ەرەجەلەردى بۇزۋ دا قاتاڭ باقىلانادى. رۇقسات ەتىلمەگەن جەرگە كولىك قويعانى ءۇشىن ايىپپۇل 130 ەۋرودان باستالسا، مۇگەدەكتەرگە ارنالعان تۇراققا زاڭسىز توقتاعان جۇرگىزۋشىلەر 400 ەۋرو تولەۋگە ءتيىس.
سونىمەن قاتار اگرەسسيۆتى جۇرگىزۋ ارەكەتتەرى دە قاتاڭ جازالانادى. وڭ جاقتان باسىپ وزۋ — 320 ەۋرو، ال كولىكتەر اراسىنداعى قاۋىپسىز اراقاشىقتىقتى ساقتاماۋ 380 ەۋروعا دەيىن ايىپپۇل سالۋعا اكەلۋى مۇمكىن.
ماڭىزدى جايتتاردىڭ ءبىرى — نيدەرلاندىدا سالىنعان ايىپپۇلداردان جالتارۋ مۇمكىن ەمەس. بۇل ەلدە تىركەلگەن ايىپپۇلدار شەتەل ازاماتتارىنان دا ءوندىرىپ الىنادى. ال تولەم ۋاقىتىندا جاسالماسا، ايىپپۇل سوماسى قىسقا مەرزىم ىشىندە ايتارلىقتاي وسەدى.
