ۇلىتاۋ وبلىسى قۇرىلعان ساتتەن باستاپ جەزقازعان قالاسىندا الەۋمەتتىك-ەكونوميكالىق دامۋ كورسەتكىشتەرىنىڭ وڭ ديناميكاسى بايقالۋدا. سونىڭ ىشىندە قالا بيۋدجەتىنىڭ كولەمى مەن ينۆەستيتسيا تارتۋ دەڭگەيى ايتارلىقتاي ءوستى.
2025 جىلى جەزقازعان قالاسىنىڭ مەنشىكتى كىرىستەرى ءۇش ەسەگە ارتىپ، 31,4 ملرد تەڭگەگە جەتتى. جالپى قالا بيۋدجەتى ەكى ەسەگە ءوسىپ، 57,6 ملرد تەڭگەنى قۇرادى. بۇل كورسەتكىش 2022 جىلى 26,5 ملرد تەڭگە دەڭگەيىندە بولعان.
وبلىس قۇرىلعاننان بەرى وبلىستىق بيۋدجەتتەن قالا بيۋدجەتىنە بولىنەتىن دامۋ ترانسفەرتتەرى 2,5 ەسەگە ارتىپ، 9 ملرد تەڭگەگە دەيىن جەتكىزىلدى. بۇل قارجى قالانىڭ ينفراقۇرىلىمىن جاڭعىرتۋعا جانە ماڭىزدى الەۋمەتتىك-ەكونوميكالىق جوبالاردى ىسكە اسىرۋعا باعىتتالۋدا.
ينۆەستيتسيالار ءوڭىر ەكونوميكاسىنىڭ تۇراقتى جانە ساپالى ءوسۋىنىڭ نەگىزگى قوزعاۋشى كۇشى بولىپ تابىلادى. اعىمداعى جىلدىڭ باسىنان بەرى ۇلىتاۋ وبلىسىنىڭ ەكونوميكاسىنا 207,3 ملرد تەڭگە ينۆەستيتسيا تارتىلدى. ونىڭ 68 ملرد تەڭگەسى جەزقازعان قالاسىنا تيەسىلى. وسىلايشا، قالانىڭ وبلىس كولەمىندەگى ينۆەستيتسيالىق ۇلەسى 32,8 پايىزدى قۇراپ وتىر.
وتكەن جىلى ءوڭىر ەكونوميكاسىن ءارتاراپتاندىرۋ اياسىندا جالپى قۇنى 34 ملرد تەڭگە بولاتىن 9 ينۆەستيتسيالىق جوبا ىسكە قوسىلسا، ولاردىڭ بەسەۋى جەزقازعان قالاسىندا جۇزەگە اسىرىلدى. بيىل جالپى قۇنى 138 ملرد تەڭگەنى قۇرايتىن 17 ينۆەستيتسيالىق جوبا باستاۋ الدى.
قازىرگى تاڭدا جەزقازعان قالاسىندا مۇناي بازاسى، جەل ەلەكتر ستانتسياسى، رەسپيراتور شىعاراتىن زاۋىت، گەولوگيالىق كلاستەر مەن قوناق ءۇي كەشەنىنىڭ قۇرىلىسى اياقتالدى. سونىمەن قاتار اسفالتبەتون زاۋىتىن سالۋ جوباسى ىسكە اسىرىلۋدا.
الداعى كەزەڭگە دە اۋقىمدى جوسپارلار بار. 2028 جىلعا دەيىن جالپى قۇنى 920 ملرد تەڭگەنى قۇرايتىن 25 ينۆەستيتسيالىق جوبانى ىسكە اسىرۋ كوزدەلىپ وتىر. بۇل جوبالار 2 مىڭنان استام جاڭا جۇمىس ورنىن اشۋعا مۇمكىندىك بەرەدى جانە قالانىڭ ەكونوميكالىق الەۋەتىن ودان ءارى ارتتىرۋعا ىقپال ەتەدى.
