ازەربايجان ارمەنياعا مۇناي ونىمدەرىنىڭ العاشقى پارتياسىن ەكسپورتتادى، دەپ حابارلايدى "ادىرنا" ۇلتتىق پورتالى APA اقپارات اگەنتتىگىنە سىلتەپ.
كەلىسىم 28 قاراشادا ازەربايجان پرەمەر-ءمينيسترىنىڭ ورىنباسارى شاحين مۇستافاەۆ پەن ارمەنيا پرەمەر-ءمينيسترىنىڭ ورىنباسارى مگەر گريگوريان اراسىنداعى كەلىسسوزدەر بارىسىندا جاسالعان. سوعان سايكەس، SOCAR مەملەكەتتىك مۇناي كومپانياسى وندىرگەن 22 ۆاگون اي-95 ماركالى بەنزين ارمەنياعا جەتكىزىلدى.
وتىن ەكسپورتى تەك كوممەرتسيالىق نەگىزدە جۇزەگە اسىرىلىپ وتىر. بەنزين حالىقارالىق نارىقتاعى باعا بويىنشا ساتىلۋدا. ال مۇناي ونىمدەرىنىڭ ءترانزيتى گرۋزيا اۋماعى ارقىلى ءبىر رەتتىك نەگىزدە جانە تەگىن ۇيىمداستىرىلعان.
رەسمي مالىمەتكە سايكەس، ازەربايجاننان ارمەنياعا مۇناي ونىمدەرىن جەتكىزۋ بەيبىتشىلىك پروتسەسىنىڭ ەكونوميكالىق تۇرعىدان ءتيىمدى ەكەنىن كورسەتەدى. بۇل قادام ەكى ەل اراسىنداعى ەكونوميكالىق جانە ساۋدا بايلانىستارىن قالپىنا كەلتىرۋ جولىنداعى ماڭىزدى كەزەڭ رەتىندە باعالانۋدا. سونداي-اق ايماقتىق ەكونوميكالىق ىنتىماقتاستىقتى دامىتۋعا جانە كورشى مەملەكەتتەر اراسىنداعى ءوزارا بايلانىستى نىعايتۋعا ىقپال ەتپەك.
ايتا كەتەيىك، بۇعان دەيىن ازەربايجان اۋماعى ارقىلى ترانزيتپەن وتكەن قازاقستاندىق بيداي تيەلگەن العاشقى پويىز ارمەنيانىڭ ايرۋم ستانتسياسىنا جەتكەنى حابارلانعان ەدى.
