2026 جىلى مارالدى اۋىلدىق وكرۋگىن دامىتۋعا 600 ميلليون تەڭگە بولىنەدى. بۇل تۋرالى شىعىس قازاقستان وبلىسىنىڭ اكىمى نۇرىمبەت ساقتاعانوۆتىڭ مارالدى اۋىلىنىڭ تۇرعىندارىمەن كەزدەسۋىندە بەلگىلى بولدى.
ايماق باسشىسىنىڭ ايتۋىنشا، 2025 جىلى جەرگىلىكتى التىن ءوندىرۋشى كومپانيامەن جاسالعان مەموراندۋم اياسىندا وكرۋگتىڭ الەۋمەتتىك-ەكونوميكالىق دامۋىنا 400 ميلليون تەڭگە ءبولىندى. اتالعان قاراجات ەسەبىنەن قىستاۋ–كۇرشىم اۋىلىنداعى ورتالىق كوشە جوندەلىپ، مارالدى اۋىلىنداعى ۇلى وتان سوعىسى ارداگەرلەرىنە ارنالعان اللەياعا گرانيت تاقتايشالار توسەلدى.
سونىمەن قاتار تۇرعىنداردىڭ قولايلىلىعى ءۇشىن Starlink سپۋتنيكتىك ينتەرنەتى ورناتىلىپ، ورتالىق ساياباقتىڭ قورشاۋى جاڭارتىلدى. اۋىل ستاديونى جاڭا سپورتتىق قۇرال-جابدىقتارمەن تولىقتىرىلىپ، جالپى پايدالانىمداعى جولدار مەن وتكەلدەر اباتتاندىرىلدى. بۇدان بولەك، ۇشبۇلاق جانە قىستاۋ–كۇرشىم اۋىلدارىندا شاعىن فۋتبول الاڭدارى، جاس ماماندار ءۇشىن تۇرعىن ۇيلەر سالىندى.
كەلەر جىلى وكرۋگتىڭ دامۋىنا 600 ميلليون تەڭگە بولىنەدى. بارلىق جۇمىستار تۇرعىنداردىڭ ۇسىنىستارى مەن وتىنىشتەرى ەسكەرىلە وتىرىپ جۇرگىزىلەدى.
كەزدەسۋ بارىسىندا وبلىس اكىمى مارالدىنىڭ تاريحي ماڭىزىنا توقتالىپ، اۋىلدىڭ بولاشاعىنا سەنىم ءبىلدىردى.
«تۋعان جەر – التىن بەسىگىم» دەيدى دانا حالقىمىز. مارالدى – اتا-بابامىزدىڭ ءىزى قالعان، ماڭداي تەرمەن كوركەيگەن، بىزگە امانات بولىپ جەتكەن قاسيەتتى مەكەن. بۇگىن ءبىز جاڭا مارالدى تۋرالى ايتىپ وتىرمىز. جاڭا مارالدى – بۇل جاي ءسوز ەمەس، بۇل – ناقتى ىستەر، ءار تۇرعىنعا كورىنىپ وتىرعان ناتيجەلەر. جاڭا مارالدى – ءۇمىت، سەنىم جانە بولاشاققا جاسالعان قادام»، – دەدى وبلىس اكىمى نۇرىمبەت ساقتاعانوۆ.
