وزبەكستاندا 27 جىل بويى ماقتا سالاسى عىلىمي ءتاسىلسىز دامىپ، سونىڭ سالدارىنان القاپتارداعى ەڭبەك جاعدايى اۋىر بولدى. بۇل تۋرالى ەل پرەزيدەنتى شاۆكات ميرزيوەۆ سىرداريا وبلىسىنىڭ فەرمەرلەرىمەن وتكەن كەزدەسۋدە ايتتى، دەپ حابارلايدى «ادىرنا» ءتىلشىسى «وزبەكستان 24» تەلەارناسىنا سىلتەمە جاساپ.
ء«ومىرىمىز ماقتا القابىندا بوسقا ءوتىپتى. 27 جىل قينالدىق. بارلىعىمىز القاپتارداعى «ماقتا اپاتىن» كوزىمىزبەن كوردىك، بىراق ناتيجە بولمادى. بۇرىن بارلىعىن القاپتارعا ايداپ شىعاتىن. اقشا دا، تەحنيكا دا بەرمەيتىن، عالىمدارعا دەگەن قۇرمەت بولمادى. ءتىپتى سىرداريا وبلىسىندا ءبىر گەكتاردان 25 تسەنتنەر دە جيناي المادىق. ەڭ باستىسى – بۇرىن ءوزىمىز وندىرگەن ماقتا شىعىندارىمىزدى دا جاپپايتىن»، – دەدى ميرزيوەۆ.
پرەزيدەنت قازىرگى تاڭداعى ونىمدىلىك كورسەتكىشتەرىن مىسالعا كەلتىردى. ول جىززاحتان شىققان ءبىر فەرمەردىڭ گەكتارىنان 85 تسەنتنەر ماقتا جيناعانىن ايتتى. سىردارياداعى كەزدەسۋدە جەرگىلىكتى ديقان «87» سورتىنان 76 تسەنتنەر ماقتا العانىن ايتىپ، مۇنى عاجايىپقا بالادى. ونىڭ سوزىنشە، ادامداردىڭ ەڭبەگىنە دەگەن قىزىعۋشىلىعى ارتقان، ويتكەنى ولار ءوز ەڭبەگىنەن ناقتى تابىس كورە باستاعان.
مەملەكەت باسشىسى قازىر ەلدىڭ دۇرىس باعىتتا كەلە جاتقانىن، بىراق جۇمىستى ءالى دە جەتىلدىرۋ قاجەت ەكەنىن اتاپ ءوتتى. 2026 جىلعا قاراي وزبەكستاندا 4,5 ملن توننا ءشيتتى ماقتا دايىنداۋ ماقساتى قويىلعان. 2025 جىلى ەلدە 3,765 ملن توننا جينالعانىن ەدى.
ەسكە سالايىق، وزبەكستاندا ماقتانى كۇشپەن جيناتۋ ونداعان جىلدار بويى، اتاپ ايتساق، كەڭەستىك كەزەڭدە دە، يسلام كاريموۆ پرەزيدەنت بولعان (1991–2016 جج.) تۇستا دا جالعاسىپ كەلدى. بۇل ۋاقىتتا ميرزيوەۆ پرەمەر-مينيستر قىزمەتىن (2003-2016 جج.) اتقارعان ەدى. جىل سايىن ماقتا القاپتارىنا بيۋدجەت سالاسىنىڭ جانە جەكە ۇيىمداردىڭ قىزمەتكەرلەرىن، ستۋدەنتتەر مەن وقۋشىلاردى جاپپاي شىعاراتىن. 2000-جىلداردىڭ ورتاسىندا Cotton Campaign حالىقارالىق كواليتسياسى Uzbek Cotton Pledge اكتسياسىن باستاپ، وعان شامامەن 300 كيىم برەندى قوسىلدى. ولار وزبەكستاندا ماقتا جيناۋداعى ءماجبۇرلى ەڭبەك جويىلعانشا، وزبەك ماقتاسىن پايدالانبايتىندارىن جەتكىزدى.
